«Адал азамат» біртұтас тәрбие бағдарламасы елдегі жекеменшік білім беру ұйымдарына да енгізіледі. Стратегиялық мәні бар ұзақ мерзімді құжат биылдан бастап қолданысқа енбек. Бұл туралы Орталық коммуникациялар қызметі алаңында өткен брифингте оқу-ағарту вице-министрі Еділ Оспан мәлімдеді.

Ақпарынша, мектептердегі тәрбие жұмысы тұжырымдамаға негізделген 6 жоба аясында жүргізіледі. Мәселен, бағдарламада сынып жетекшілерінің де біліктілігін арттырып, оқушымен, ата-аналармен жұмысты одан әрі нығайту қарастырылған.

Еділ Оспан, ҚР Оқу-ағарту вице-министрі:

- «Адал азамат» бағдарламасының түпкі мақсаты – қоғамның мызғымас тірегі, отаншыл, білімді, жасампаз ұрпақ тәрбиелеу, әділеттіліктің, адамгершіліктің, жауапкершілік пен еңбексүйгіштіктің айқын бейнесі болатын адал азамат қалыптастыру. «Адал азамат» біртұтас тәрбие бағдарламасы тек қана білім беру ұйымдарындағы емес, барлық мемлекеттік ұйымдардағы тәрбие жұмысына қатысты іс-қимылдың негізіне айналады. Сондықтан Оқу-ағарту министрлігі осы жұмыстарды бағдарлама аясында біріздендіруді жүргізіп жатыр.