Облыс әкімі Құмар Ақсақалов Тобыл қаласында жаңа бой көтерген бес қабатты үйдің тұрғындарына пәтер кілттерін табыс етті, деп жазады Egemen.kz.

Салтанатты рәсімге пәтер иелерінің туыстары мен жақындары қатысып, қоныстойға арнайы әзірленген наурыз көжеден ауыз тиді.

Баспаналы болғандардың дені 10-15 жыл бойы пәтер кезегінде тұрған. Мысалы, ата-анасынан ерте айырылған Жәмила Досмайылова баспана кезегіне 2009 жылы тіркелген. Бүгінде үш бала тәрбиелеп отыр.

«Бұған дейін Қостанайдан пәтер жалдап келдік. 15 жыл бойы кезекте тұрып, көптен күткен қуанышқа бүгін жетіп отырмыз», дейді Жәмила.

Баспана қуанышына ие болған Сара Лоба 34 жастағы науқас ұлын бағып отыр. «Отбасымда өзім ғана жұмыс істейтіндіктен, пәтер жалдап тұру қиын. Кемтар ұлымды жиырма жасында баспана кезегіне тіркеттім. Бүгін, міне, төбеміз көкке жеткендей болдық. Біз көрпесіне қарай көсіліп, қарапайым тұрмыс кешкен отбасымыз. Мемлекеттің қолдауын, қамқорлығын әрдайым сезініп, шүкірлік етіп келеміз. Ең бастысы, елімізді осындай бірліктен, бейбіт күннен айырмасын. Дүние, баспана дегендер бірте-бірте орнына келеді», дейді Сара Лоба.

Қоныстой иелерін өңір басшысы құттықтап, ізгі тілегін арнады.

«Рамазан айы – жақсы ойдың, жақсы тілектің, жақсы істердің айы. Бүгінгі қуаныш осы Рамазан айында наурызбен тұспа-тұс келіп отыр. Мен сол қуаныштарыңызды арнайы бөлісуге келіп отырмын. Ұлыстың ұлы күні қарсаңында қоныстанып жатқан үйлеріңіз қуанышқа, ырыс-берекеге толсын!», деді Құмар Ақсақалов.

Өткен жылы өңірде бой көтерген бес мың пәтерлі тұрғын үйдің ішінен 940 пәтер кезекте тұрған көп балалы аналарға, кемтарлар мен ата-ана қамқорлығынан қағылған жандарға берілген. Аталған санаттағы азаматтарға биыл тағы 1000 пәтер бөлінеді.