Тараздық арулар ат құлағында ойнады.

Жастайынан жылқыға үйір болған Аида Ізбасар енді ат спортынан қыздар құрамасын жасақтауды көздейді. Сол үшін аймақтың бұрымдыларын жинап, тұлпар мініп, тақым қысуға баулып жүр.

Аида Ізбасар бала кезден жылқыға жақын өскен. 7 жасында-ақ атқа мінуді үйреніп алған. Мамандығы есепші бола тұра, тұлпарларды таңдап атбегілікті қолға алды. Бұл шешіміме еш өкінбеймін, — дейді атбегі.

Аида Ізбасар, атбегі:

- Көбісі ойлайды атқа мінген қыздар ерсі деп. Олай емес ерте заманда ата бабамыздың заманында әйел азаматтар атқа қонған. Жаугершілік заманда атқа мініп ер азаматтардың бір жағында жүрген. Мен аттың қасында ерекше бақыт табамын. Әсіресе шапқан кезде бүкіл уайымды ұмытасың, еркіндік сезімі болады. Аттың үстінде жүрек соғысы жақсарады, адамның қан айналымы реттеледі.

28 жастағы Аида қазір Тараздық аруларды атты тізгіндеуге үйретіп жүр. Қыз қуу, теңге ілу спортына да баулиды. Қазірдің өзінде 10-нан аса бұрымды тұлпарға бой үйретіп, ұлттық ойынды меңгере бастаған.

Әдемі Әділ, жас спортшы:

- Осы мен атқа мінгелі бойымда бір күшті қасиеттер пайда болды. Мысалы, қорқыныш жойылды. Және де басқа да сенімділік пайда болды. Менің алдағы уақытта арманым, көкпар және теңге ілу, қыз қуудан чемпион болғым келеді.

Сағынбек Көшкінбаев, шабандоз:

- Аида қызымыз келіп осы жерде өзінің атқа деген құмарлығын көрсетіп. Сол қыздың артынан жақсы қыздарды алып келіп осы ат спортына үлкен үлес қосып жатқан жері бар. Асауды асау демейді, жуасты жуас демейді қай кезде болса да қандай жылқыға болса да мінуден еш уақытта тайсалмай ол қыз.

Бұрымдының бастамасын аймақтың атбегілері де қолдап отыр. Қажет болса жаттығуға жылқы беріп, білгенімен бөлісуге даяр. Осылайша ат баптап, асау мінген арулар ұлттық спорттың дамуына үлес қосып жүр.

Мерей Бает, Елдар Байділдә