0:00:00

Жаңалықтарды Telegram арнамыздан оқыңыз!

Қазақстан мен Өзбекстанның туризм саласындағы әлеуеті Орталық Азиядағы өзге мемлекеттерден оқ бойы озық. Сарапшылар пікірі осындай. Ынтымақтастық алдағы уақытта арта түспек. Тәшкен мен Самарқанға баратын саяхатшылардың бестен бірі қазақстандық болса, Түркістанға сапарлап, Иасауи кесенесін зиярат етуге ағылған өзбек ағайындар да аз емес.

Қос ел бірлесе қолға алуды жоспарлаған жоба «Аралас саяхат» деп аталады. Жүзеге асса, көршілес екі мемлекеттің біріне келген саяхатшы екіншісіне де атбасын бұрып көрікті жерлерді кедергісіз аралай алады. Бұл туристерге де тиімді. Бір сапарда екі бірдей елді көру өте жақсы мүмкіндік дейді олар.

Эфи Константинидис, турист:

Осы сапар барысында Орталық Азияның картасына үңіліп, Қазақстанның бұл елмен шектесіп жатқанын, тым жақын орналасқанын көрдім. Бәлкім, сіздің елге де барып, тарихи орындарды аралап қайтсақ деген ой келді.

Өзбекстанға былтыр 8 миллиондай шетелдік турист қыдырып келген, олардың басым бөлігі Қазақстан, Ресей мен Қырғызстан азаматтары.

Хуршид Раззоқов, туристік компания өкілі:

Қазақстандық қонақтар наурыз мерекесінде өте көп келеді. Демалысты бауырлас елде өткізуді жөн көреді. Былтырдан бері екі ел арасында Жібек жолы пойызы жүре бастады. Бұл да туризм саласындағы ынтымақтастықтың дәлелі. Алматы- Ташкент- Самарқан бағыты болашақта Бұқара мен Хиуаға дейін ұзарады деген жоспар бар.

Туристерді қызықтыратын танымал бағыттардың қатарына соңғы уақытта Қарақалпақстан қосылды. Ал Орталық Азияның інжу маржаны саналатын Самарқан шахарындағы ең ірі университетте Абай атындағы ғылыми мәдени орталық жұмыс істейді. Ол өткен жылы Қазақстан елшілігінің бастамасымен ашылған.

Базаркүл Отыншиева, тілші:

Көне тарихтан сыр шертетін киелі орындар қасиетті мекендерімен танымал Самарқан шахары Әмір темірдің мәңгілік тыныс тапқан мекені. Яғни, түркі халықтарына ортақ билеуші әрі ұлы қолбасшы осы шахарда жатыр. Ал Әмір темірдің қазақ жерінде, оның ішінде Отырар өңірінде қаза тапқаны тарихтан мәлім.

Әмірдің кесенесіне, Регистан мен Шахи зинда сәулет кешендеріне жыл сайын сан мыңдаған турист келеді. Қос ел саланы бірлесе дамыту, киелі орындарды насихаттауды одан әрі жандандыру жұмыстарын алдағы уақытта да жүргізе бермек. Зиярат және гастрономиялық туризм бойынша тиісті келісімдер жасалып та қойған.

Базаркүл Отыншиева