Тарих қойнауына қызықты саяхат жасайтын робот.

Италияның Рим қаласындағы көне ғибадатханада жасанды интеллект орнатылған құлтемір өз қызметіне кірісті. Озық технологияны жасауға 30-дан астам адам қатысқан.

Өнертабысты қолданысқа енгізбес бұрын ғалымдар 1 жарым жыл бойы еңбек етіпті.

Робот ғибадатхана есімі берілген Рим императоры Адрианның құрметіне «Адриано» деп аталады. Қала қонақтары мен тұрғындарын есіктен қарсы алады. Сыртқы келбеті адамға ұқсас. Мимикалары шынайы, эмоциясын да көрсетеді. Сондықтан адамдармен қызық әңгіме құруға қауқарлы.

Джованни Розато, Италия технология институтының инженері:

- Роботтың ерекшелігі сол – қолы адамдікіндей. Яғни кез келген қозғалысқа икемді. Біреу құшақтағысы немесе қол алысқысы келсе, соған бейімделе алады. Қолдары өндірістік құртемірлердікі сияқты қатты емес. Адам бұлшықеттерін қайталайтын моторларды «Soft Robotics» зертханасының инженерлері ойлап тапқан.

Жүйенің қауіпсіздігін қамтамасыз ету үшін роботқа жасанды зерде мен 30 түрлі сенсор орнатылған. Бұл құлтемірге тұрған орнын анықтауға, айналасын картаға түсіруге көмектеседі. Сондай-ақ, соғылып қалудан қорғайды. Робот Рим тарихы туралы итальян және ағылшын тілдерінде ақпарат береді. Ғалымдар алдағы уақытта басқа тілдерді де қосуға ниетті .

Лоренцо Тальяванти, Рим сауда палатасының президенті:

- Рим – екі мың жылдық тарихы бар көне қала. Бірақ жаһандық үдерістен де тыс қалмай келеді. Біз Римнің ұлылығын сақтап қалсақ дейміз. Ол үшін жаңа технологияның игілігін қолдануға ден қойдық. Бұл істе бізге ADRIANO роботы көмектеседі. Ол екі мың жыл бұрынғы оқиғаларды бүгінгі күнмен байланыстырып айтып бере алады.

Өнертапқыштар алдағы уақытта заманауи технологияның көмегімен тарих беттеріне жан бітірмек. Ол үшін робот «Адрианоның» мүмкіндіктерін пайдалануды жоспарлап отыр. Жоба іске асса, адамдар виртуальды көзілдірік киіп, император Адрианның ғибадатханасын қашықтан көру мүмкіндігіне ие болады.

Зайнұр Байжігіт