Жазғы демалыста баланың үйде отырмайтыны белгілі. Ауылдағысы қаланы көргісі келеді. Қаладағылар ауылға баруы мүмкін. Сосын еңбекке ерте араласып, табыс тауып, әке-шешеме қолғабыс етемін дейтін жасөспірімдер де көп. Солардың біразы шаһардың тазалығына атсалысады.

Жаз шығысымен «Жасыл елге» жүгіретін жасөспірімдер көп. Бағдарлама аясында 14 жасқа толған кез келген бала қала көркіне өз үлесін қоса алады. Әрине, тегін емес.

5 мыңнан аса астаналық жас еңбек маусымын бастады. Солардың бірі – Балнұр Бауыржанқызы. Биыл 9-сыныпты тәмамдаған бұрымды қыз енді орта арнайы білім беру мекемесіне құжат тапсырмақ. «Жасыл ел» бағдарламасы арқылы жаз бойы еңбек етіп, керек-жарағымды өзім сатып алсам дейді.

Балнұр Бауыржанқызы, «Жасыл ел» жасағының мүшесі:

- Колледжге дейін керек ақшамды жинау үшін жұмыс істеп жатырмын. Мұнда жұмыс істегеннің жақсы жері таза ауаны ластамай, тазалап, қоқыстарды құртып жатырмыз.

«Жасыл ел» бағдарламасы аясында еңбек еткен жастарға айына 64 565 теңге төленеді. Жасөспірімдер аптасына 5 күн, ал күніне 4 сағат жұмыс істейді.

Ерлан Айдар, Астана қаласы әкімдігі Жастар саясаты басқармасының бөлім басшысы:

- Біздің мақсатымыз – жастарды мектеп кезінен бастап еңбекке баулу. Жастарға айналаның тазалығын сақтауды үйрету. Өздеріне қажетті заттарды алуға үлкен жәрдем деп ойлаймыз. Сонымен қатар жастардың мектеп аумағында, гүлзарларда жұмыс істеуге құқығы бар.

Жауаптылардың айтуынша, 16 жасқа толмаған жастар заңнамаға сәйкес 4 сағаттан артық еңбек етпейді. Оларға жеңіл жұмыс беріледі. Бүл үшін бала ата-анасымен келіп, сенімхат тапсыруы қажет. Ал 16-дан асқан жастар өздері өтініш толтыра алады.