Цифрлық даму, инновациялар және аэроғарыш өнеркәсібі министрлігі Starlink компаниясының (SpaceX-тің еншілес құрылымы) спутниктік интернет қызметін ел аумағында ресми іске қосуға келіскен.

Құжат компанияның еліміздің ақпараттық қауіпсіздік және байланыс саласындағы заңнамасын толық сақтай отырып жұмыс істеуіне бағытталған. Сатылымдар 2025 жылдың үшінші тоқсанында басталмақ.

Жобаны іске асыру елдің шалғай өңірлерін жоғары жылдамдықтағы спутниктік интернетпен қамтамасыз етуде маңызды қадам саналады. Бұл өз кезегінде цифрлық байланыс мүмкіндігін кеңейтіп, телекоммуникациялық инфрақұрылымды дамытуға сеп болады.

Сонымен қатар, жоғары жылдамдықты интернетке Starlink арқылы қосылу ауылдық мектептер, медициналық мекемелер, мобильді топтар мен инфрақұрылым нысандарына сапалы байланысқа қол жеткізуге мүмкіндік береді. Бұл, әсіресе, талшықты-оптикалық желілерді экономикалық немесе техникалық тұрғыдан тартуға қиындық тудыратын өңірлерде өзекті болмақ.

– Қазақстан – аумағы кең, халқы әр өңірге шашыраңқы орналасқан ел. Барлық тұрғынды сапалы интернетпен қамту үшін біз талшықты-оптикалық байланыс желілерінен ұялы байланыс мұнараларына дейінгі түрлі тәсілді қолданамыз. Десе де, жайылымдар, таулы ауылдар мен шалғайдағы кәсіпорындар сияқты қолжетімділігі күрделі аймақтар да бар. Ондағы тұрғындар да сапалы интернетке қол жеткізуі тиіс. Қазіргі уақытта әлемде бұған мүмкіндік беретін технологиялар бар. Бүгінге дейін Starlink елімізде тек мектептерге интернет ұсынып, пилоттық режимде жұмыс істеп келді. Ал халық үшін ол ресми түрде қолжетімсіз еді. Енді біз келісімге келдік, компания ақпараттық қауіпсіздік пен байланыс саласындағы ұлттық заңнама талаптарына сай жұмыс істейтін болады. Биыл қажетті жұмыстар жүргізіліп, тұрғындар ресми әрі заңды түрде спутниктік интернетке қосыла алады, – деді Цифрлық даму, инновациялар және аэроғарыш өнеркәсібі министрі Жаслан Мадиев.

Starlink жабдықтарын заңдастыру мен ресми қолдану мәртебесінің ерекше маңызы бар. Бұдан былай азаматтар терминалдарды заңды түрде сатып алып, Қазақстан Республикасының заңнамасына сәйкес тіркей алу мүмкіндігі бар.

Жобаны іске асырудың барлық кезеңі ұлттық заңнама талаптарын, соның ішінде қауіпсіздік талаптарын сақтай отырып жүргізілмек.

Бұл бастама ел Президентінің қала мен ауыл арасындағы цифрлық теңсіздікті азайту жөніндегі тапсырмасын орындау аясында жүзеге асырылуда және "Қолжетімді интернет" ұлттық жобасының мақсаттарына сәйкес қолға алынған.