Курчатовта жылдар бойы бос тұрған көпқабатты тұрғын үйлер жаңғыртылып жатыр, деп хабарлайды 24kz.

Биыл екі үйге күрделі жөндеу жасалады. 106 пәтер көпбалалы аналар, ата-ана қамқорлығынсыз қалған балалар мен әлеуметтік осал топтағы отбасыларға тегін беріледі.

Сонымен қатар тұрғын үй кезегінде тұрған әскери және мемлекеттік қызметкерлер де тізімде бар.

Рүстем Қайратұлы, тілші:

- Қаңырап бос тұрған көпқабатты үйлердің қазіргі көрінісі осындай. Ал мынау жөндеуден кейінгі келбеті. Құрылыс компаниялары тұрғын үйлерді қайта жаңғыртып жатыр. Яғни, шатырын жөндеп, қасбетін қалпына келтіреді. Инженерлік жүйелерін түгел қайта жаңартады.

Үйлерді жеке инвесторлар өз қаражатына жаңғыртып жатыр. Құрылыс аяқталған соң баспананы мемлекет сатып алады. Кейін пәтерлер тұрғын үй кезегінде тұрғандарға беріледі. Курчатовта 244 адам баспана кезегінде тұр.

Берік Жолдахмет, қала әкімі орынбасарының міндетін атқарушы:

- Өздеріңіз көріп тұрғандай, бұл үйде толық жөндеуден өтеді. Едендеріне линолеум жайылады. Төбелеріне тартпа, керме төбе деймізғой. Қабырғаларына түсқағаз жабыстырылады. Одан кейін су, жылу барлығы кіріп тұрады осы үйлерге.

Көпқабатты тұрғын үйдің біреуі шілде айында халық игілігіне беріледі. Ал екінші үйдің құрылысы қыркүйекте аяқталады. Бұл жаңалыққа Курчатов тұрғындары қуанышты. «Себебі бос тұрған үйлер қаланың көркін қашырып тұрған еді», - дейді.

Блиц 1:

- Біз қуаныштымыз, енді бұл үйлер бос тұрмайды. Қаламыз көркейіп, жандана түседі. Бұрын бұл үйлердің жағдайы нашар еді. Балалар үшін де қорқынышты болатын.

Блиц 2:

- Менің ойымша, бұл өте дұрыс шешім. Адамдарға пәтер берілгені жақсы. Бір жағынан туған қаламыздың көркін бұзбай, қайта жаңартады.

Қазіргі таңда Курчатов қаласында бос тұрған 8 көпқабатты үй бар. Соның екеуі биыл қалпына келтіріледі. Ал келесі жылы тағы екі үйді жөндеу жоспарланып отыр.

Авторлары: Рүстем Қайратұлы, Берік Жобалайұлы