Қазақстан мен Қытай арасындағы теміржол арқылы жүк тасымалдау көлемі биыл жыл басынан 23,2 млн тоннаға жетті.

Бұл көрсеткіш былтырғыдан 10 пайызға көп. Экспорт 9 пайызға өсіп, 14,3 млн тоннаға жетсе, импорт 12 пайызға артып 8,9 млн тоннаны құрады. Ал өткен айдың басында Достық — Алашанькоу бағыты арқылы Қытайға 1 тәулік ішінде 28 құрам жөнелтілді. Бұл рекордтық көрсеткіш дейді мамандар. "Қазақстан Темір Жолы" ұлттық компаниясы ұсынған дерек осындай. Сонымен қатар Бақты — Аягөз үшінші теміржол өткелін салу жобасы да іске асырылмақ. Оны пайдалануға беру 2028 жылдың басына жоспарланған. Жүк тасымалы көлемінің өсуі еліміздің транзиттік әлеуетін арттырары сөзсіз. Мәселен, Қытайдың Чэнду қаласынан Польшаның Лодзь шаһарына Қазақстан арқылы жүк тасымалдайтын теміржол бағыты бар. Бұл жол Қазақстанның Қытай мен кәрі құрлық арасындағы стратегиялық маңызын көрсетеді.