Қырғызстан мен Тәжікстан басшылары шекара мәселесін түбегейлі шешті, деп хабарлайды 24KZ. Тарихи келісімге қырғыз елінің басшысы Садыр Жапаров пен Тәжікстан президенті Эмомали Рахмон қол қойды. Осылайша қос тарап арадағы шекарасын шегендеп алды. 500 шақырым шекараны анықтап, бекіту ісі осыдан 3 жыл бұрын басталып, бүгін өз мәресіне жетті .

Қырғыз Респуликасы мен Тәжікстан арасындағы жер дауы 30 жыл бойы шешілмей келді. Мұның салдары қарулы қанды қақтығысқа ұласып тұратын. Енді бүкіл кикілжіңдер өткеннің еншісінде қалуы тиіс. Себебі құжатты әзірлеуде екі жақтың мүддесі толық ескерілді.

Садыр Жапаров, Қырғыз Республикасының президенті:

- Екі елдің шекарасын заңды түрде рәсімдеу – Қырғызстан мен Тәжікстан халқы үшін ғана емес, бүкіл халықаралық қауымдастық үшін тарихи сәт. Бұл қадамымыз егемендігімізді, тұтастығымызды әйгілеп қана қоймай, бүкіл Орталық Азия елдерінің тұрақтылығы мен қауіпсіздігін нығайтуға сеп болары сөзсіз.

3 жылға созылған арадағы келіссөздер оңай болған жоқ. Мәселен, Тәжікстан «Головной» су алу нысанын пайдалану үшін қырғыз еліне 750 гектар жер берді. Тараптар бір-бірімен жер алмасып, бірқатар жергілікті тасжол мен ауылшаруашылық және энергетикалық нысанды бірге қолдануға уағдаласты.

Эмомали Рахмон, Тәжікстан Республикасының президенті:

- Шекараны бекіту жөніндегі келісім арадағы қарым-қатынасқа тың серпін береді. Бүгінгі кездесулер де арада орнаған байланысты одан әрі күшейтеді деген сенім мол.

Бүгін Қырғызстан мен Тәжікстан бір-біріне шекараларын айқара ашты. 2021 жылы көктемде қарулы қақтығыстардан кейін «Қызыл-бел» мен «Қайрағаш» өткізу бекеттері жабылған еді. Сондай-ақ көрші екі ел әуе қатынасын жандандыруға да келісті.

Авторлары: Зайнұр Байжігіт, Бақыт Чермашев