Самұрық-Қазына еншілес компанияларының бірін таратуға ниетті.

Бұл жайлы бас қалада өткен қоғамдық кеңесте, қор төрағасы Нұрлан Жақыпов айтты. Алда директорлар кеңесі «Самұрық-Қазына Бизнес Сервис» компаниясын тарату туралы талқылау өткізеді. Сондай-ақ келелі кеңестің қатысушылары қордың даму динамикасын, басым бағыттарын пысықтады.

Төрт жылдың төңірегінде Самұрық-Қазынаның табысы орташа есеппен 13 пайызға өскен. Ал былтыр бірлестік бюджетке 1,3 трлн теңге салық төледі. Бұл қорға қарасты компаниялардан түскен дивидендтер сомасынан 6 есе көп. Дегенмен, биылғы кіріс көңіл көншітпеуі мүмкін. Оған қара алтын құнының арзандауы себеп көрінеді.

Нұрлан Жақыпов, "Самұрық-Қазына" АҚ Басқарма төрағасы:

- Қор қызметінің көрсеткішінде пост кезеңнен бастап салыстырғанда оң өсім байқалады. Қор елдегі ірі жұмыс беруші. Біз жыл сайын өндірістік қызметкерлердің жалақысын көтереміз. Сонымен қатар таза табыс та артып келеді. 2025 жылы қаржылық көрсеткіштердің төмендеуіне мұнай бағасының 81 доллардан 75 долларға дейін төмендеуіне байланысты.

Дейтұрғанмен, бірлестік биыл да байырқалы бастамаларға мұрындық болуға бейіл. 2025 жылы 7 жоба жүзеге асады. Мәселен, қор қажысымен 66 ауыл газбен қымтылады. Сондай-ақ, Кендірліде су тұшыту зауыты іске қосылады. Бұдан бөлек басқарма қор құрылымын жаңғыртуды жоспарлап отыр.

Нұрлан Жақыпов, "Самұрық-Қазына" АҚ Басқарма төрағасы:

- Самұрық-Қазына экономикадағы мемлекеттің үлесін азайту мақсатында қор құрылымын әрі қарай оңтайландыру туралы шешім қабылдады. Қор тобындағы активтердің тиімділігі мен олардың құнын арттыру, сондай-ақ бейіндік емес активтерден арылу бойынша жұмыстарды жалғастыруда.

Отандық өндірушілерді қор тарапынан қолдау ісі де қарқын алады. Былтыр тараптармен 1,1 трлн теңгеге келісім-шарт жасалды. Бұл 2023 жылмен салыстырғанда 76 пайызға көп. Сондай-ақ 191 млрд теңгеге офтейк-келісімге қол қойылды.

Шернияз Жалғасбекұлы, Бағдат Қайыркен, Нұржан Ықыласов