Хромтау моноқаласында индустриялық аймақ құрылды, деп хабарлайды 24KZ. Тау-кен өнеркәсібіне айтарлықтай үлес қосып отырған Ақтөбе облысындағы бұл шаһарда шағын және орта бизнеске қолайлы жағдай жасалып жатыр. Ірі өндіріс орындарының айналасында кәсіпкерлікті дамытуға мүмкіндік беретін бизнес белдеуі құрылып, экономиканы әртараптандыруға бағытталған нақты қадамдар жасалып отыр.

Хромтау индустриялық аймағы аудан экономикасының ауыр өнеркәсіпке тәуелділігін азайту мақсатында құрылды. Бұл шешім тау-кен өндірісі қарқынды дамыған моноқалада халықтың негізгі бөлігі – шамамен 12 мың адам – шахта мен зауыттарда жұмыс істейтіндіктен қабылданды. Жаңа индустриялық аймақ ең алдымен экономиканы әртараптандыруға және бизнестің дамуына серпін беруге бағытталған. Қазіргі уақытта ауқымды жобаның қажетті инженерлік желілерін жүргізу үшін жобалық-сметалық құжаттама рәсімделіп жатыр.

Нұрхан Тілеумұратов, Хромтау ауданының әкімі:

- Бұл жоба жүзеге асқан соң салық төлемдері 1 млрд 700 млн теңгеге артуы тиіс. Индустриялық аймақта импорттық өнімдердің орнын басатын тауар өндіріледі. Ең бастысы біз өндірістегі жергілікті қамту үлесін шамамен 80%-ке жеткіземіз.

Хромтау индустриялық аймағында кәсіп ашуды көздейтін жергілікті инвесторлар да аз емес. Мәселен, құтыдағы ауызсу шығаратын мына серіктестік. Қазір тәулігіне 20 мың бөтелке суды тұтынушыға жөнелтеді. Бұл аудан халқын қамтуға толық жеткенімен, кәсіпкер облыс, республика нарығына шығуды да мақсат тұтқан. Ол үшін өндіріс ауқымын кеңейту қажет.

Бақытқали Оразғалиев, өндіріс орнының директоры:

- Қазір біз аудан орталығындағы барлық ірі кәсіпорынды сумен қамтамасыз етіп отырмыз. Сауда желілеріне шығуды жоспарлағанымызбен, цехтың мүмкіндігі шектеулі. Ғимаратымыз 250 шаршы метр ғана. Кемінде 600 шаршы метр қажет. Сондықтан индустриялық аймақтан орын алғымыз келеді.

Индустриялық аймақпен қатар Хромтау қаласында бизнесті әртараптандыруға бағытталған «Өркен» бағдарламасы іске асырылып жатыр. Бұл өңірлік жоба моноқаладағы шағын және орта бизнестің дамуына серпін берді. Нәтижесінде жалпы құны 2 млрд теңгеге жуық 100-ге тарта жаңа кәсіпкерлік нысаны ашылды.

Әлиасқар Отарбай, Хромтау аудандық кәсіпкерлік бөлімінің басшысы:

- Бағдарламаның кәсіпкерлерге арналған түпкілікті мөлшерлемесі 3% құрайды. Жалпы Мемлекет басшысының тапсырмасына сәйкес бұл бағдарламаны осы моноқаланың кәсіпкерлері пайдалана алады.

Олар сәйкесінше ірі кәсіпорындардың төңірегіндегі шағын және орта бизнес белдеуі болмақ. Болашақта шаһарды монақала санатынан шығаруға серпін береді. Қазірдің өзінде аудан орталығында 3200 бизнес нысанында 8 мыңға жуық тұрғын нәпақа тауып жүр.

Авторлары: Мансұр Есқожин, Болатбек Молдағалиев, Айбек Даутов