Сауалнаманы InterNations ұйымы жүргізген.

Зерттеу қорытындысында Асан Қайғы іздеген "Жерұйық" Орталық Америкадан табылды, деп хабарлайды inbusiness.kz сайты.

Осылайша, әлем бойынша Коста-Рика көшуге ең оңай әрі қолайлы ел болып танылған. Аталған сауалнамада бұл ел екі негізгі бағыт бойынша бірінші орынды иеленіп, қалған барлық фактор бойынша үздік ондыққа кірген.

Зерттеуге әлемнің 53 елінен кем дегенде 50 экспат қатысып отыр. Коста-Рикаға көшкен адамдардың дені (83 пайызы) өзін өз үйіндегідей сезінетінін және онда өте жақсы қарсы алғанын (88 пайыз)айтты.

Респонденттердің басым көпшілігі жергілікті мәдениетке бейімделу өте оңай деп есептейді. Сондай-ақ, сауалнамаға қатысқан шетелдіктер жергілікті тұрғындарды "әлемдегі ең қонақжай халық" деп санайды.

Рейтингте екінші орынды "дос табу" санатында көш бастап тұрған Мексика мемлекеті иеленген. Осы санат аясында шетелдіктер жаңа елде достар тапқан-таппағаны және жергілікті халық арасында жаңа таныстар табу қаншалықты оңай екендігін бағалаған.

Үздік үштікті Филиппин елі түйіндеп тұр. Бұл ел сауалнамадағы факторларда 6-орыннан еш төмен түспеді.

Экспаттар үшін ең қолайсыз елдер қатарында Кувейт, Норвегия және Германия бар.