Ал агроөнеркәсіп кешенін субсидиялауға кейінгі 6 жылда 2,5 триллион теңге бөлінді.

Нәтижесінде ауыл шаруашылығының жалпы өнімі 8,3 трлн теңгеге дейін өсті. Былтыр дән егіп терлеген диқандар рекордтық өнім алды. Саланы дамытуға мемлекет тарапынан үлкен қолдау бар. Соның арқасында экономиканың осы бағыты жақсы көрсеткіштерге ие болып отыр. Алдағы уақытта шаруаларға тағы қандай көмек берілмек?

Танап басында тынбай еңбектенген диқандар былтыр астықтың рекордтық өнімін алды. Қамбаға 27 млн тоннаға жуық дәнді-дақыл жиналды. Бұл 10 жылда болмаған көрсеткіш. Жалпы соңғы 6 жылда салаға деген қолдау ерекше артқан.

Мәселен, агроөнеркәсіп кешенін субсидиялауға 2,5 триллион теңге бөлінді. Соның арқасында ауыл шаруашылығының жалпы өнімі 1,8 есеге дейін артқан. Ал азық-түлік өндірісінің көлемі 2,1 есе ұлғайды.

АӨК субсидиялау

6 жыл ішінде – ₸2,5 трлн

ауыл шаруашылығының жалпы өнімі – 1,8 есе

₸8,3 трлн

Олжас Тлебалдин, ҚР Ауыл шаруашылығы министрлігінің ресми өкілі:

- Биыл жалпы субсидиялаудың барлық бағыттары бойынша мемлекеттік шаралары жалғастырылатын болады. Қазіргі таңда 430 млрд теңгеге жуық субсидиялауға бағыттау жоспарлануда. Ол жергілікті атқарушы органдардың қаражаттарында көзделген. Одан бөлек жеңілдетілген кредитпен қамтамасыз ету туралы мемлекет басшысының тапсырмасына сәйкес 700 млрд теңгеге дейін жеткізілмекші болып отыр.

Отандық тауар өндірушілерді қолдау Президент басымдық берген негізгі бағыттың бірі. Бүгінде мемлекеттік сатып алуда да басымдық негізінен қазақстандық кәсіпкерлерге беріледі. Атап айтқанда, машина жасау, металлургия, құрылыс, жеңіл және химия өнеркәсібі, сондай-ақ азық-түлік тауарлары бойынша тек қана отандық өндірушілерден сатып алынатын тауарлардың, жұмыстар мен көрсетілетін қызметтердің тізбесі едәуір кеңейтілді. Тағы айта кету керек, ауыл шаруашылығының техникалық паркін жаңарту үшін жеңілдетілген лизинг бағдарламасы да сәтті жұмыс істеп тұр.

Айдарбек Сапаров, ҚР Ауыл шаруашылығы министрі:

- Жеңілдікті лизинг бағдарламасын жүзеге асырудың арқасында өткен жылы ауыл шаруашылығы техникасы паркін жаңарту 5,5% құрады. 200 млрд теңгеге жеңілдетілген лизингті ұйымдастыру отандық техникасының 6 мың бірлігін сатып алуға мүмкіндік береді. Бүгінгі таңда 3200 шаруадан 130 млрд теңгеге 5 мың бірлік техника сатып алуға өтінім келіп түсті.

Айта кету керек, соңғы жылдары еліміз экономиканың басты даму күші болған мұнай-газ секторын ғана емес, өзге де салаларға басымдық беріп келеді. Ұлттық даму институттары да Қазақстан экономикасына салынатын инвестиция көлемін ұлғайта түсуде. Мәселен, тек 2025 жылдың өзінде ғана «Бәйтерек» холдингі арқылы 8 триллион теңге инвестиция салынады деп күтіледі. Президент тапсырмасына сай бұл сома алдағы 2 жылда 10 трлн теңгеге дейін жетуі тиіс.

Бауыржан Ысқақ, экономист:

- Ең жақсы көрсеткіш құрылыс саласында болып жатыр, 96 пайызға дейін. Яғни 96 пайыз құрылысқа қажетті өнімдердің өзіміздің отандық тауарлардың үлесімен қамтамасыз етілуі. Міне осындай факторлар барлық салада, ауыл шаруашылығында болса, ШОБ өнім өндіретін тауарлардың өңдеуші сектордағы үлесін біз кем дегенде 50 пайыздан жоғары қылатын болсақ, онда әлеуметтік мемлекетке айналып отырған экономикамыздың шығындардын да өзіміздің ішкі ресурстарымен жаба аламыз.

Әлемде геосаяси ахуал ушығып тұрғанына қарамастан ел экономикасы тұрақты өсімін көрсетіп тұр. Былтыр жан басына шаққандағы жалпы ішкі өнім 14 мың доллардан асты. Осылайша Қазақстан табысы жоғары елдер тобына жақындай түсті.

Риат Шони