Оның сөзінше, бүгінде 12,1 млн гектар жер мемлекетке қайтарылған.

Парламент мәжілісінің депутаты Бақытжан Базарбек мәжілістің жалпы отырысында жер сатылмайтынын айтты.

"Бүгінгі таңда игерілмеген және жеке адамдарға заңсыз берілген ауыл шаруашылығы жерлерін мемлекет меншігіне қайтаруға қатысты үлкен жұмыс атқарылып жатыр. Қазірдің өзінде 12,1 млн гектар жер қайтарылды, оның 4,9 млн гектары халыққа үлестірілді. Бұл жай ғана құрғақ статистика емес. Біріншіден, әр сот шешімінің артында нақты адамдар тұр. Олар әділдік бар екеніне және мемлекеттің оны қалпына келтіруге мүдделі екеніне айқын мысал бола алады. Екіншіден, жердің сатылмайтыны қоғам санасында және саяси практикада шегеленген. Президент айтқандай, жер – біздің басты байлығымыз. Онсыз біздің мемлекетіміз де болмайды", – деді мәжіліс депцтаты.

Оқи отырыңыз: Қазақстанда 27 миллион гектар жайылым жердің тозығы жеткен

Бақытжан Базарбек мемлекетке қайтарылған жер халыққа тек заңды жолмен үлестірілетінін атап өтті.

"Үшіншіден, жер мемлекет меншігіне қайтарылады және тек заңды жолмен үлестіріледі. Төртіншіден, жер мәселесі төңірегінде саяси ұпай жинауға тырысып, халықтың сеніміне ие болып, оны ақшаға айналдырғысы келген әртүрлі популистер мен жалған белсенділер әшкереленді. Ірі компаниялар мен кәсіпорындардың мүддесі ондаған жыл бойы қоғам мен мемлекет мүддесінен жоғары болды. Соларға арнап заңдар жазылды. Олардың атына стратегиялық нысандар, су қоймалары, жер, ЖЭО, ГРЭС, жер қойнауының ресурстары өтті", – деді ол.