Ұлттық нақыштағы зергерлік бұйымдарға сұраныс артып келеді, деп хабарлайды 24KZ. Түркістандық қолөнер шеберлерінің айтуынша, қазіргі таңда зергерлік бұйымдар мен қазақы ат әбзелдеріне тапсырыс берушілердің қатары көбейген. Әсіресе Наурыз мейрамы қарсаңында шеберлердің жұмысы қыза түседі. Олар жасаған бұйымдарын мерекелік көрмелерге ұсынуға дайындалып жатыр.

Түркістандық зергер Сұлтанғали Темірұлы 10 жылдан бері қазақтың ұлттық ою-өрнегімен безендірілген бұйымдар жасайды. Көздің жауын алатын сырға, білезік, шолпы, шашбауларды ақық тастармен көмкеріп, күміспен күптейді. Шебер соңғы кездері ұлттық нақыштағы әшекейлерге сұраныс артқанын айтады.

Сұлтанғали Темірұлы, зергер:

- Қазақша бұйым тағу, қазақы киім кию қазір трендте. Сондықтан барлық бұйымға сұраныс бар. Қыздардың сырғалары, алқаларына тапсырыс көп түседі. Ұршық сырға деп айтамын. Мына жерде ағашы, жібі оралып тұрады. Ұршықтың негізгі бейнесіне келтіріп жасадық. Ерекше болғысы келген қыздар осындай ерекше бұйымдарды алып тағып жүреді. Наурыз мерекесіне орай көрмелер болады. Соған осындай бұйымдарымды көптеп жасап жатырмын.

Ертұрман жасайтын Жанболат Сүйінбай атакәсіпті әкесінен үйренген. Бала кезінен қасында жүріп, ат әбзелдерін жасаудың қыр-сырын әбден меңгеріп алған. «Ертұрман жасау үшін алдымен ағаш пен теріні, одан қалды темірді меңгеруі керек. Сонда ғана жасаған дүниең көңілден шығады», – дейді шебер.

Жанболат Сүйінбай, шебер:

- Көбінесе көрмеге шығамыз, қалалық болсын, облыстық, республикалық, халықаралық көрмелерде телефон нөмірімізді 50-60 адам алып қалады. Соның оны жай тапсырыс береді. Ресейден де алады. Қазір тапсырыс Қытайдан келіп жатыр. Тапсырыс жаман емес. Біз үлгере алмай жатырмыз. Ерді бұл станокқа салып шығара салатын нәрсе емес те, қолмен жасалады. Қазір жобамен айна екеуін жасаймыз. Жылына 25, ары кеткенде 30 шығармыз.

Бүгінгі таңда Түркістан облысында 150-ге шебер тұрады. Мамандар соңғы жылдары ұлттық қолөнер шеберлеріне деген көзқарас өзгеріп, қамқорлық күшейіп келетінін айтады. Қазақ-өнер ұлттық қауымдастығы шеберлердің білімін жетілдіріп, жұмысын жүйелеуге, жасаған бұйымдарын өткізіп, халықаралық көрмелерге қатысуына қолғабыс етпек.

Айгүл Жансерікова, Қазақ өнер ұлттық қауымдастығының президенті:

- Қазір тренинг жүріп жатыр, қалай брендинг жасайды, қалай олардың бұйымдары нарыққа сай болады деген сияқты. Алда туристік маусым басталады. Ол жерде де шеберлер тұрады. Сондай іс-шаралардың бәрінде қолдау көрсетіп, олардың білімдерін арттырып, бұйымдарын жәрмеңкеге шығарып, Түркістан қаласының тұрғындарына ғана емес, осында жүрген туристерге, келіп жатқан қонақтардың бәріне көрсетуге көмектесеміз.

Жақында Түркістан қаласына ерекше мәртебе берілді. Құжатқа сай қолөнершілерге үлкен қамқорлық жасалады деп күтіліп отыр. Олардың сатып алған шикізаты мен құрыл-жабдықтарының және ғимаратты жалға алған шығынының 25%-ін мемлекет өтеп бермек.

Авторлары: Жандос Жұмабек, Ерболат Әбіш