Бұл Нариманның Париж олимпиадасындағы күміс медальдан кейінгі алғашқы жүлдесі.

Бүгін қазақстандық гимнасттар Нариман Құрбанов пен Зейнолла Идрисов Түркияның Анталья қаласында өтіп жатқан гимнастикадан әлем кубогының кезеңінде ат снарядындағы жаттығулардың финалында сәтті өнер көрсетті.

Нариман Құрбанов аталмыш бағдарлама түрінен 14,634 ұпай жинап, жеңіс тұғырының ең жоғарғы сатысына көтерілді. Айта кетейік, бұл гимнасттың Париж Олимпиадасынан кейінгі алғашқы халықаралық жарысы болды. Зейнолла Идрисов 14,300 ұпаймен екінші орын алды. Үшінші орынды Ахмад Абу Аль Сауд (Иордания) иеленді – 14,200.

Айта кетейік, Нариман гимнастикамен алты жасынан бастап айналысады. Әкесі Құсанжан Құрбанов тәжірибелі бапкер болғандықтан, баласының спорттық жолына ықпал еткен. Нариманның айтуынша, ол кішкентай кезінде үлкен жетістіктерге жетпеген және қатардағы спортшылардың бірі болған.

2017 жылы Монреальда өткен әлем чемпионатында Нариман “Kurbanov” деп аталатын жаңа элементті сәтті орындап, оны гимнастика ережелеріне енгізді. Бұл элемент — қос тұтқалы ат снарядында кері бағытта қозғалу.

2024 жылы Нариман Құрбанов Парижде өткен Жазғы Олимпиада ойындарында қос тұтқалы ат снарядында күміс медаль жеңіп алып, Қазақстанның спорттық гимнастика тарихында жазғы ойындарда жүлде алған тұңғыш спортшы атанды.