Ол ең ұзақ уақыт өлім жазасын күткен тұтқын ретінде Гиннесс рекордтар кітабына енген.

Жапония тұрғыны Ивао Хакамадэ – 47 жыл бойы өлім жазасын күткен кінәсіз сотталушы, деп жазады inbusiness.kz сайты.

Kyodo агенттігінің мәліметінше, мұндай шешімді Жапонияның Сидзуока префектурасындағы округтік соты шығарған.

Кәсіби боксшы саналатын Хакамадэге "1966 жылы төрт адамды өлтірді" деген айып тағылып, қамауға алынған. Қаза тапқандар оның бастығы мен жұбайы, екі баласы болған. 20 күндік тергеу барысында Хакамадэ кінәсін мойындаған, десе де сотта мойындауына қатты азаптау әсер еткенін мәлімдеген.

1968 жылы оны өлім жазасына кескен, содан бері 47 жыл бойы түрмеде отырды. Бұл жағдай Гиннесс рекордтар кітабына ең ұзақ уақыт өлім жазасын күткен тұтқын ретінде енді.

2014 жылы сот айыпталушының ДНҚ-сы қылмыс орнындағы қан ізімен сәйкес келмейтінін анықтады. Солай бола тұра ол 2024 жылы 88 жасында ғана толық ақталып шықты. Бұл оқиға қоғамда үлкен резонанс тудырып, үкімет пен полиция одан ресми түрде кешірім сұрады. Ивао Хакамадэге 217 миллион иен (шамамен 1,44 миллион доллар) көлемінде өтемақы берілді.