Атырау облысы Жылыой ауданында су тасқынның алдын алу үшін 100 шақырымнан асатын бөгет тұрғызылды. Ескі арналар аршылып, өзен түптерін тереңдету жұмыстары жүргізіліп жатыр. Былтыр Жем өзені арнасынан асып, Құлсары қаласы су астында қалған еді. Сондықтан биыл мамандар ерте қамданды. Қазір өзен деңгейі қанша метрге көтерілген? Қауіп бар ма?

Жем өзені Құлсары қаласына таяу орналасқан Тұрғызба ауылын жанап ағады. Қазір онда жағдай қалыпты. Дегенімен төтенше жағдай қызметінің мамандары мен ауыл тұрғындары күн санап арнасы толып келе жатқан өзен жағасында бөгет салып жатыр.

Қорабай Тайшыбаев, Тұрғызба ауылының тұрғыны:

- Мына судың барлығы бір арнамен ағып жатыр, бұрынғыдай емес. Бұрын жайылып аққандықтан білінебейтін. Жәйлап көтеріліп жатыр. Кешегі 1,80 см болды деп еді, енді 2 метрге жақындап қалды деп отыр ғой.

Былтырғы тасқыннан сабақ алған жергілікті билік биыл ерте қамданған. Күні бүгін Жем өзені мен қаланы бойлай ағатын Құрсай каналы бойында ұзындығы 100 шақырыман астам бөгет соғылды. Көміліп қалған арналар аршылып, су Каспий теңізіне бағытталып жатыр.

Нұрберген Құсайынов, облыстық құрылыс басқармасының басшысы:

- Бұл жерде ені 50 метр болатын және тереңдігі 2-2,5 метр болатындай Жем өзенінің арнасы кеңейтіліп, тереңдетілген. Арнайы тағы да дамбылар салынған. Оның табаны 20 метр, үсті 6 метр болатын. Әр 50 см сайын пресстелген.

Жем өзенінің арнасы наурыздың 20-нан көтеріле бастады. Тасқыннан қорғану жұмысына аудан бойынша 472 адам, 75 техника жұмылдырылған. Ақтөбе және Маңғыстау облыстарынан қосымша көмек келіп жетті.

Нариман Өтешов, облыстық ТЖД бастығының орынбасары:

- Қорғаныс министрілігінен 150 әскери қызметкер келіп, қазір толықтай жұмыс атқарылуда. Бүгінгі уақытта Жемнің пигі өтіп жатыр, судың қауіпті белгісі 340 см болса, қазір 260 см-мен жүріп жатыр. Қазіргі кезде Жем өзенін 6 бекетке бөліп қойғанбыз. Барлық жерде 24/7 күні-түні жұмысшы қызметкерлер бөлінген.

Аудан бойынша жағдай бақылауда. Су тасқыны қаупі қайтқан соң, Жем және Құрсай өзендері бойынан 3 гидроқондырғы салу жоспарланған. Жоба құны — 30 млрд теңге.

Арыстанбек Кенже, Айбек Байзақов, Жандос Рахметуллин

Upd: 27.03.2025, 20:03