Керісінше , толық емес отбасылардағы балаларға арналған квота көбейеді.
Жоғары білім және ғылым министрлігі жоғары оқу орнына түсу кезіндегі қабылдау квотасына өзгерістер енгізуді жоспарлап отыр. Бұл туралы Ашық НҚА порталындағы құжат жобасынан белгілі болды.
Атап айтқанда:
- Үкімет айқындаған өңірлерге қоныс аударған ауыл жастары арасынан шыққан Қазақстан азаматтары үшін қабылдау квотасы 5-тен 3 пайызға дейін азаяды;
- кемінде үш жыл толық емес отбасы мәртебесі бар отбасылардағы балаларға арналған квота 1-ден 3 пайызға дейін артады.
Жоғары білім және ғылым министрлігінің түсіндіруінше, өзгерістер қажеттілікпен квоталардың игерілуі үлесіне қарай қолға алынып отыр.
Еске салайық, Үкімет айқындаған өңірлерге қоныс аударған ауыл жастары арасынан шыққан Қазақстан азаматтары үшін қабылдау квотасы мен жалпы ауыл квотасы – екі бөлек. Қазіргі таңда ауыл квотасы 35% болса, Үкімет айқындаған өңірлерге қоныс аударған ауыл жастары арасынан шыққан Қазақстан азаматтары үшін қабылдау квотасы 5 пайызды құрайды.
Оқи отырыңыз: Грант байқауы: Қандай квоталар бар және кімдер тегін оқи алады
Жалпы, Қазақстанда квотаның келесі түрлері бар:
- I немесе II топтағы мүгедектігі бар адамдар, бала кезінен мүгедектігі бар адамдар, мүгедектігі бар балалар арасынан шыққан азаматтар үшін – 1%;
- басқа мемлекеттердiң аумағындағы ұрыс қимылдарының ардагерлері, жеңілдіктер бойынша Ұлы Отан соғысының ардагерлеріне теңестірілген ардагерлер үшін – 0,5%;
- ауыл квотасы – 35%;
- Қандас квотасы – 4%;
- жетім балалар және ата-аналарының қамқорлығынсыз қалған балалар, кәмелетке толғанға дейін ата-анасынан айырылған немесе ата-анасының қамқорлығынсыз қалған жастар санатындағы азаматтар үшін – 1%;
- үкімет айқындаған өңірлерге қоныс аударған ауыл жастары арасынан шыққандар үшін – 5% (алдағы уақытта 3%-ға дейін азаяды);
- кәмелетке толмаған төрт және одан көп бала тәрбиелеп отырған отбасылардағы балалар үшін – 5%;
- кемінде үш жыл толық емес отбасы мәртебесі бар отбасылардағы балалар үшін – 1% (алдағы уақытта 3%-ға дейін артады);
- бала кезінен мүгедектігі бар балаларды, І немесе ІІ топтағы мүгедектігі бар адамдарды тәрбиелеп отырған отбасылардағы балалар үшін – 1%.
Сондай-ақ, 2024 жылы су басқан өңірлердің талапкерлеріне грант санының 20%-ы бөлінді.
