Қазақ балалары қара домбыраны әлемге паш етіп жүр.

Астанадағы Қаныш Сәтбаев атындағы білім-лицейінің оқушылары Түркияда өткен дүниежүзілік додада топ жарды. Енді өнерлі өрендер Гүржі елі мен Біріккен Араб Әмірлігінде жалғасатын байқауда ұлттық дәстүрімізді дәріптейді.

Бұл Анадолыда атой салған қазақ балалары. Елордалық өрендер Түркияда өткен «AlashStar» халықаралық байқауында бір емес үш бірдей жүлдені қанжығасына байлады.

Алтынай Барлыбай, оқушы:

- Ол жерде Құрманғазы атамыздың Балбырау күйін тарттым. Сол жекемен шығып екінші орын алдым. Ал біз трио болып Қазанғап Тілепбергенұлының Ақжелең күйін орындадық. Онымен бірінші орын алдық.

Жанболат Дүйсембай, оқушы:

- Түркиядағы жарыс өте керемет өтті. Еш қобалжусыз сахнаға шығып ойнадық. Әли екеуміз Ертұран, Алаш аманаты күйлерін попури қылып ойнадық. Сосын гран при ұтып алдық.

Домбыраның құлағында ойнайтын балалар Айнұр Жанатқызының шәкірттері. Бүгінде ұстаз екі бірдей білім ордасында 100-ге тарта баланы ұлттық аспапқа баулып отыр. Бірақ үйірмеге ұяда көргенін ілуге келгендер саусақпен санарлық. Көбінің домбыраға қызығушылығы әлеуметтік желі арқылы оянған дейді, ұстаз.

Айнұр Жанатқызы, домбыра мұғалімі:

- Қазіргі таңда домбыраға қызығушылық артып жатыр. Балаларды ата-аналары жетелемейді, олар өздері келіп жатыр. Негізі бала 6 жастан бастап үйрену керек. Кішкентай баланың саусағы қатаймаған. Үлкейгенде қиынға соғады.

Иә, нағыз қазақ қазақ емес, нағыз қазақ домбыра. Осы бір ұлттық аспап арқылы ұлтымыздың құндылығын құнттап, дәстүрімізді дәріптеп жүрміз. Өскелең ұрпақты бала жастан ұлттық мұраға бейімдесек, ұлт ретінде ұтарымыз көп болады.