Қорқыт ата атындағы Қызылорда университетінің 100 студентінен құрылған «Eco life» клубы оқу орнында ашылған жиырма екінші студенттік ұйым болып отыр, деп жазады Egemen.kz.

22 наурыз – Дүниежүзілік су күні мен 26 наурыз – Арал теңізі күніне орай ұйымдастырылған іс-шарада клуб жетекшісі, «Электр энергетикасы, техносфералық қауіпсіздік және экология» білім беру бағдарламасының аға оқытушысы Светлана Қожамбердиева клуб мүшелеріне су экологиясы мен ресурстарын тиімді басқарудың маңыздылығын айтты.

«Қазір Аралды құтқару бағытында жоспарлы түрде ғылыми жұмыстар жүргізіліп жатқаны белгілі. Әлем назарындағы айдынды сақтап қалу үшін жастарды экологиялық мәселелерді шешуде ғылыми зерттеулер жүргізуге, жалпы қоршаған ортаны қорғауға баулу басты міндетіміз»,– деді жетекші.

Студенттердің қоршаған ортаға көзқарасын қалыптастырып, экологиялық мәдениетті дамытуға баулитын клуб мүшелерінің зерттеу жұмыстарын жүргізіп, іс-шаралар ұйымдастыруы үшін жаңғыртудан өткен дәрісхана пайдалануға беріліп отыр.

Клубтың ашылуына орай ұйымдастырылған іс-шарада қалдықтарды қайта өңдеу, су мен энергияны үнемдеу, табиғат ресурстарын сақтауға бағытталған көрме қойылды.