«Ақтау – түркі әлемінің мәдени астанасы» жобасының ашылу салтанатына қызу дайындық жүріп жатыр , деп хабарлайды 24KZ. Халықаралық шара 5 сәуірде теңіз жағалауында ұйымдастырылады.

Қазір құрылысшылар 15-ші шағынаудан жағажайында дала сахнасын тұрғызып жатыр. Сондай-ақ амфитеатр алаңында «Дархан дала» атты этноқалашық бой көтереді. Оның аумағына 20-дан астам киіз үй тігу жоспарланған. Этноқалашық Ақтау қаласы және өңірдегі бес аудан атынан 6 этноауылға бөлінеді.

Салтанатты шараға 500-ден астам өнерпаз қатысады деп күтіледі. Тең жартысына жуығы Түркия, Әзербайжан секілді бауырлас елдерден келеді.

Айта кетсек, былтыр түркі халықтарының мәдени астанасы деп, Түрікменстанның Анау қаласы атанса, биыл бұл мәртебе Ақтау қаласына берілді.

Нұрболат Құдысов, облыстық ғылыми-әдістемелік және мәдени қызмет көрсету орталығы директорының орынбасары:

- Бұл «Дархан дала» этноауыл қалашығы салынып жатқан. Қазір мына 6 ауданға бөлінген. Әр ауданға, әр қалашықта 2 алты қанаттық киіз үй және бір темір үй тігіледі. Осы барлық қалашықтарда қолөнер шеберлерінің көрмесі және жәрмеңкесі өтеді. Үлкен сахна құрылып жатыр, мына амфитеатрдан бөлек. Көптеген атақты жұлдыз келеді.