Қазақстандықтардың 85%-і этносаралық қатынастарға көңілі толады. Тоқсан сайын жүргізілетін мониторинг нәтижелері осындай. Сауалнамаға 2 мың адам қатысқан. Зерттеу кезінде интервью, эксперттік сауалнама, контент талдау әдістері қолданылған. «Ал нәтижеге бірнеше фактор әсер етеді», – дейді мамандар. Олар – әлеуметтік-экономикалық жағдайдан бастап білім, денсаулық сақтау саласында болып жатқан жағдайлар.

Биыл Қазақстан халқы Ассамблеясының құрылғанына 30 жыл. Осыған орай Астанадағы Достық үйінде ассамблея кеңесінің отырысы өтті. Жиынға қатысушылар елдегі қоғамдық келісім мен жалпыұлттық бірлікті сақтаудағы ассамблеяның рөлін талқылап, алдағы жұмыс жоспарымен танысты.

Айгүл Сәдуақасова, ҚХА ғылыми сараптама кеңесінің төрағасы, Қолданбалы этносаяси зерттеулер институты директорының орынбасары:

- Қазақстан Республикасының негізгі саясаты бұл әрбір азамат тең құқылы. Сондықтан оның ешқандай шығу тегіне қарамастан, әлеуметтік-экономикалық жағдайына қарамастан бәрі де тең болу керек деген қағидатты әрдайым ұстанып жүру керек. Ассамблеяның негізгі құрылған мақсаты – бұл қоғамдағы келісімді, осындай бейбітшілік өмірді сақтау және соған барлық жағдайды жасау, мемлекеттік қызметті іске асыруда өзінің де ықпалын көрсету.