Экологиялық аумақта мұндай тәжірибе тұңғыш рет қолға алынған.

Мамандар дрон арқылы тұқым себудің тиімділігі мен өнімділігін ерекше айтып отыр, деп жазады inbusiness.kz сайты.

Биыл 100 мың гектар аумаққа әуеден тұқым себу жоспарланған. Ерекшелігі сол, агродронмен тек сексеуіл ғана емес, өзге галофитті өсімдіктер де егілуде.

Арал теңізінің құрғаған табанына тұқым себу жұмыстары кейінгі жылдары қарқынды жүргізіліп келеді.

– Арал теңізінің кепкен жеріне фитомелиоративті өсімдіктерді өсіру жоспарда бар. Осы мақсатта агродронды сынап көріп жатырмыз. Бұл құрылғы 50 келіні көтере алады. Біз кустарниктің тұқымдарын агродронмен жайып көрдік. Сарысазан және өзге де тұқымдарды сынап көреміз. Бұл бағдарлама 3 жылға арналған, – дейді "Ә.Бөкейхан атындағы Қазақ орман шаруашылығы және агроорман мелиорациясы ғылыми-зерттеу институты" ЖШС Алматы филиалының директоры Руслан Ахметов.

Жалпы, Арал теңізінің құрғаған ұлтаны – шамамен 6 миллион гектар. Оның 2 миллион 800 мың гектары Қазақстан аумағында орналасқан.

– Іс-шара аясында 120 мың гектар алқапқа галофитті өсімдіктердің тұқымы себіліп, бүгінде 16 мың гектар алқапқа сексеуіл көшеттерін отырғызу басталды. Жоба біріншіден, өңірдің экологиялық жағдайын жақсартуға септігін тигізсе, екіншіден, әлеуметтік маңыздылығы да ерекше. Яғни, жергілікті тұрғындар жұмыспен қамтылып отыр, – деді "КАТКО" БК" ЖШС бас директоры Бастьен Паскаль.

Өз кезегінде Орман шаруашылығы және жануарлар дүниесі комитетінің төрағасы Данияр Тұрғамбаев бұл жобаның басты мақсаты тұз бен шаңды борандардың алдын алу және Арал өңірінің экожүйесін қалпына келтіру екенін айтты.

– 2024 жылы "ҚазМұнайГаз" компаниясының көмегімен 15 мың гектар жерге егу жұмыстары жүргізілді. 2024-2025 жылы "Катко" компаниясының көмегімен 120 гектар жерге себу жұмыстары және 2025 жылға арналған 16 мың түп сексеуілдің 11 800-і осы компанияның күшімен жүзеге асырылып жатыр, – деп атап өтті ол.

Еске салайық, Мемлекет басшысы 2021 жылы 5 жылда теңіз ұлтанындағы 1 миллион 100 мың гектар жерге шөлге төзімді өсімдіктер егуді тапсырған болатын. Қазірге дейін 780 мың гектарға мелиорациялық жұмыстар жүргізілді.

Бұған дейін Экология және табиғи ресурстар министрі Ерлан Нысанбаев Арал теңізінің ұлтанына қанша гектар сексеуіл егілгенін айтқан болатын.

Inbusiness.kz сайты сондай-ақ "Қазақстанның шөлді аймағында алып орман пайда болуы мүмкін" деген тақырыпта сараптамалық мақала да жариялады.