Маңғыстау облысында қалааралық қоғамдық көліктерге жол қозғалысы ережелерінің бұзылуын автоматты түрде тіркейтін жүйе пилоттық режимде енгізілді, деп хабарлайды El.kz интернет порталы.

Жол-көлік оқиғаларының алдын алу және жол қозғалысы ережелерінің сақталуын бақылау мақсатында Маңғыстау облысы цифрлық технологиялар басқармасы, облыстық жолаушылар көлігі және автомобиль жолдары басқармасы мен полиция департаменті бірлесіп қоғамдық көліктерге интеллектуалды бақылау жүйелерін орнату жобасын іске қосты.

Жоба аясында «Ақтау – Жаңаөзен – Ақтау» бағытында жүретін қалааралық автобусқа жол қозғалысы ережелерін автоматты түрде тіркейтін заман талабына сай аппараттық-бағдарламалық кешен орнатылды.

Аталған жүйе нақты уақыт режимінде жылдамдықты асыру, жол таңбаларын сақтамау, қауіпті жүргізу және өзге де заң бұзушылықтарды анықтай алады. Сынақ кезеңі аяқталған соң жүйенің тиімділігіне кешенді талдау жүргізіліп, оның нәтижесіне қарай жоба аясын кеңейту туралы шешім қабылданады. Яғни, болашақта өңірдегі өзге де қалааралық бағыттарда жүретін автобустарға осыған ұқсас бақылау жүйелері орнатылуы мүмкін.