Италиялық зерттеушілер тобы бұған дейін Мысыр аумағынан жерасты жасырын қаланы тапқан болатын.

Жуырда олар тағы бір ұқсас құрылымды анықтап, бұл Гиза пирамидаларын шамамен 910 метр (2 000 фут) тереңдікте бір-бірімен байланыстыратын жерасты кешенінің бар екенін тапты, деп жазады inbusiness.kz сайты Azertag агенттігіне сілтеме жасап.

Алғаш рет 2024 жылғы наурызда Хафра пирамидасының астынан үлкен жерасты құрылымының табылғаны жарияланған еді.

Алайда бұл жаңалық жетекші археологтардың сын-ескертпелеріне ұшырап, олар зерттеу қорытындыларын "жалған" әрі ғылыми негізден ада деп атады. Себебі георадардың мұндай тереңдікке дейін сканерлей алмайтынын алға тартқан болатын.

Соған қарамастан, бірнеше айдан кейін зерттеу тобы ең кіші негізгі пирамида Менкаура астынан да осындай шахталар табылғанын хабарлады.

Зерттеудің авторы әрі Шотландиядағы Стратклайд университетінің радиолокация маманы Филиппо Биондидің айтуынша, алынған мәліметтер Менкаура пирамидасының астында Хафрадағыдай тірек құрылымдардың бар болу ықтималдығы 90 пайыз екенін көрсетіп отыр.

– Біз бұл қорытындыға томография деректерін объективті талдау арқылы келдік. Бұл құрылымдар эксперименттік өлшеулер негізінде Хафра пирамидасының астынан анықталған элементтердің Менкаурада да бар екенін айқын көрсетеді, – деді Бионди.

Оның айтуынша, Гиза кешеніндегі барлық құрылым өзара байланыста болуы мүмкін. Бұл өз кезегінде пирамидалардың аса ірі жерасты инфрақұрылым кешенінің "айсбергтің ұшы" ғана екенін дәлелдейді.

Зерттеуші Бионди мен оның командасы бұл нысандар шамамен 38 мың жыл бұрын өмір сүрген, жойылып кеткен көне өркениетке тиесілі деген болжам айтады. Дегенмен археологтардың басым бөлігі Гиза пирамидаларының жасы 4,5 мың жыл деп есептейді.

Зерттеушілердің хронологиясы бойынша, бұл өркениет шамамен 12 800 жыл бұрын жаһандық апат, мысалы кометаның соқтығысуы салдарынан жойылып кеткен. Салдарынан жер бетін су басып, хаос орнап, өркениеттің көп бөлігі жойылған.

Аман қалғандар өз білімін астрономия, инженерия және киелі архитектура салаларындағы тәжірибелерін кейінгі өркениет, соның ішінде көне мысырлықтарға мұра етіп қалдырған.