Иранның ядролық бағдарламасы бойынша АҚШ-пен арадағы келіссөз 15 маусымда Оман астанасында өтеді . Мұны екі елдің ресми өкілдері растады.

«Рейтердің» хабарлауынша, америкалық делегацияны президенттің арнайы өкілі Стивен Уиткофф бастап барса, Тегеран тарапын Сыртқы істер министрі Аббас Аракчи басқарады. Иран уранды бейбіт мақсатта игеру құқығын қорғамақ. Ол ядролық бағдарламасын шектеу үшін АҚШ-тан санкцияларды толық алып тастауды басты шарт етіп қойды. Ал Вашингтон: «Ядролық бағдарламаны толық тоқтату керек», – дейді.

12 сәуірден бері Иран мен АҚШ арасында тікелей емес келіссөздің 5 кезеңі өтті. Оларға Оман арағайындық қылған. Бірақ ешқайсысында құжаттарға қол қойылған жоқ.

Исмаил Багаи, Иран Сыртқы істер министрлігінің баспасөз хатшысы:

- Уран дамытумен айналысатын елдің бәрі ядролық қару бағдарламасына ие емес. Уран байыту – Иранның ядролық отын тізбегінің маңызды бөлігі және ядролық өнеркәсібінің басты элементі. Бұл технология – Иран ғалымдарының ондаған жыл бойғы қажырлы еңбегінің нәтижесі. Кейбір елдер Израильдің әскери ядролық бағдарламасына белсенді түрде атсалысып жатыр. Ядролық қаруды таратпау бойынша көсемсіп сөйлейтіндер Израильдің әскери ядролық әлеуетін нығайтуға бар күшін салып, ал Иранның бейбіт ядролық жоспарларына күмән келтіреді.