Елімізде құны 918 миллиард 300 миллион теңге болатын 400-ге жуық мемлекеттік меншік және квазимемлекеттік нысан бәсекелестік ортаға берілді.

Бұл туралы Премьер-министр Олжас Бектенов арнайы кеңесте айтты. Сондай-ақ 69 нысан қайта таратуға жіберіліп, 21-і саудаға шығарылған. Ал 155 ғимарат сатылымға дейінгі дайындықта. Одан бөлек, жер беру тетігінің ашықтығын қамтамасыз ету мақсатында ауыл шаруашылығына жарамды жерлердің 100 пайызы цифрландырылды. «Мемлекеттік мүлік туралы» заңға тікелей сатудан бас тартуды және мүлікті тек аукциондар арқылы беруді көздейтін түзетулер әзірленді.

Жиын соңында Премьер-министр экономиканы ырықтандыру және жекешелендіру мәселелері бойынша жұмыстарды әрі қарай жандандыруды тапсырды.