Тартысты өткен матч 1 сағат 45 минутқа созылды.

Қазақстандық теннисші, жұптық сында еліміздің бірінші ракеткасы және әлемнің 9-ракеткасы Анна Данилина Лондонда (Ұлыбритания) өткен WTA 500 санатындағы турнирге қатысты, деп жазады inbusiness.kz сайты.

Данилина ресейлік әріптесі Диана Шнайдермен бірге жарыстың екінші ракеткасы ретінде тіркелген болатын. Финалда олар америкалық Айша Мухаммад пен нидерландтық Деми Схюрспен чемпиондық атақ үшін күш сынасты. Бұл – Анна үшін қатарынан екінші финал. Бұған дейін ол алғаш рет Ролан Гаррос турнирінің финалына дейін жеткен еді.

Бірінші партияда есеп 5:4 болып, Данилина – Шнайдер дуэті сетке доп бергенде, бұл мүмкіндікті пайдалана алмады – 5:7. Екінші сетте олар 5:1 есебімен алға шыққанымен, қарсыластары таразы басын теңестірді. Алайда тай-брейкте қазақстандық-ресейлік жұп 7:6 (7:3) есебімен басым түсті. Шешуші супер тай-брейкте Мухаммад пен Схюрс қарсыластарынан айласын асырып, 10:4 есебімен жеңіске жетті.