«Алтай – түркі әлемінің алтын бесігі». Осындай атаумен Шығыс Қазақстан облысы Катонқарағай ауданында халықаралық музыкалық фестиваль өтті. Түркі халықтарының мәдени мұрасы мен тарихи сабақтастығын ұлықтаған дүбірлі мерекеге 10 мың адам жиналды. Поэзия кешімен басталған мәдени жоба барысында аламан бәйге мен көкпар ұйымдастырылып, шетелдік қонақтарға ұлттық спорт түрлері де насихатталды.

Табиғаты тамсандырған, ақынға шабыт беріп, әншіге ән салдырған Катонқарағай төрінде үш күн бойы дүбірлі той өтті. Фестиваль шымылдығы осы өлкеден шыққан қазақтың қос классигі Қалихан Ысқақ пен Дидахмет Әшімханұлына арналған ғылыми конференциямен ашылды. Келелі жиын поэзия кешіне ұласты. Облыс әкімі рухани кездесуге келгендерге шабыт тілеп, қос қаламгердің қазақ әдебиетіндегі орнына тоқталды.

Нұрымбет Сақтағанов, облыс әкімі:

- Қалихан Ысқақ: «Менің көкірегіме жазып алған Алтайым бөлек, ол жердей жер жоқ», – десе, Д. Әшімұлы: «Не жазсаң да, шындықты жаз, талайға тағылым ұрпаққа ұлағатты жақсыны жаз», – деген екен. Бұл сөздер қос қаламгердің туған жері мен төл әдебиетіне деген шексіз сүйіспеншілігін, адамгершілік ұстанымын, биік парасатын көрсетеді.

Ат тұяғы дүбірлеген аламан бәйге мен көкпар да өтті. Дегенмен 11 елдің өнерпазы қатысқан музыкалық кештің орны бөлек еді. Әсіресе ең жас қатысушы, Саха елінен келген Архан Уйгу «Домбыра» әнімен қошеметке бөленді. Қазақтың ұлттық аспабын ұлықтаған ұланға облыс әкімі домбыра тарту етті.

Семён Алексеев, фестиваль қонағы:

- Керемет әсерге бөлендік. Осындай жерге келіп, баламыздың өнер көрсеткенін мақтан тұтамын. Архан ұлым үшін бұл үлкен тәжірибе болды. Түбі бір ел екеніміз ерекше сезіледі.

Фестиваль соңында түркі әлемінің тарихи-мәдени байланысын айқындайтын Берел қорғанынан табылған жәдігердің сахналық символы таныстырылды. Жалпы бұл кеш Алтайдың адамзат өркениетінің бесігі ретіндегі маңызы мен мәртебесін паш еткен мәдени жоба ретінде есте қалды.

Авторлары: Эльмира Ахметова, Жігер Бабаханов