Шымкентте жолақысын төлеуді талап еткен қоғамдық көлік жүргізушісі соққыға жығылды . Оны жолаушылардың бірі қасындағы 3 серігімен бірге жабылып ұрып, балғамен басын жарған.

Көптің жағасын ұстатқан оқиға кешкі сағат 8-ге таяу болған. №52 бағыттағы автобустың жүргізушісі Мақсат Жолаев сол күнгі соңғы айналымын аяқтағалы келе жатқан. Ол базар аялдамасынан түспек болған жасөспірімге жолақы төлеуді ескертеді. Бұл сөзге ашуланған жолаушы алдымен жүргізушіні балағаттап, автобустан жерге түсуін талап етеді. Сол жерде оған бірнеше азамат жабыла кеткен.

Мақсат Жолаев, автобус жүргізушісі:

Біреуінде балға болды, солбалғамен басыма ұрды ғой. Басым жарылған. Екіншісінде кастет бар еді, автобуста отырған балада. Жыртылған жерді тіккен, жағдайым өте ауыр. Бір нәрсе болса, құсамын.

Жүргізуші есін жедел жәрдем көлігінде келе жатқанда бір-ақ жинаған. Жағдайы ауыр болғаны соншалық, оны бірден жансақтау бөліміне жатқызады. Дәрігерлерлердің айтуынша, оның басы жарақаттанып, миы шайқалған.

Ерлан Құрбанқожаев, медициналық клиника басшысының орынбасары:

Стационарлық көмек қажет болғандықтан, оны реанимация бөліміне жатқызып, кейін жақсаруына байланысты нейрохирургияға шығарылды. Қазір жағдайы орташа ауырлықта. Тиісті емін алуда. Пациент бақылауда.

Болған оқиғаға байланысты полиция қылмыстық іс қозғады. Бұзақылығы үшін тек 17 жастағы жасөспірім қамауға алынған. Ал серіктестері әлі күнге бостандықта жүр, — дейді соққыға жығылған азамат.

Мақсат Жолаев, автобус жүргізушісі:

Полицияға шағым түсірдік. Баланы ұстады. Бірақ қасындағы балаларды мойындатпай жатыр. Бір өзім ұрдым дейді. Ұрды ма, үшеуі де жазалансын.

Полиция бұған қатысты тек жазбаша ғана жауап қайтарды. Онда «Оқиғаның мән-жайын толық зерделеу үшін кешенді тергеу шаралары жүргізіліп жатқаны» жазылған.

36 жастағы Мақсат Жолаев 5 жылдан бері қоғамдық көлік жүргізіп келеді. 4 баланың әкесі жалғыз өзі жұмыс істеп, отбасын асырап келген.

Ғани Қалмаханов