Алдағы жылы интернет жылдамдығы секундына 200-ден 500 мегабитке дейін жетеді.

Бүған Каспий табанымен тартылатын талшықты-оптикалық кабель мүмкіндік береді. Оның жалпы өткізу қабілеті секундына 400 терабит. Президент жобаның жүзеге асырыла бастағанын айтқан болатын. Қазақстан мен Әзербайжан бірлескен компания құрып, жұмыс жүргізіп жатыр. Бұдан бөлек теңіз арқылы жасыл энергияны Еуропаға жеткізу жоспарланған.

Желден жүйрік интернет үшін арақашықтық маңызды. Шалғай болған сайын шабаңдай береді. Сондықтан сымды жарық көмегімен және Каспий түбімен тарту жолы қарастырылып жатыр. Яғни талшықты-оптикалық кабель жүргізіледі. Бұған Қазақстан мен Әзербайжан елдерінің басшылары келісті.

Азамат Серіктаев, ҚР Телекоммуникациялар комитеті басқармасының басшысы:

- Оңтүстік-шығыс Азия мен Батыс елдерінің жалпы 100 пайыз деп алсақ үлесін. Қазақстанның үлесі осы ақпаратты өткізуде тек қана 1,5 пайыз болып тұр. Енді осы жоба іске асқаннан кейін біз бұл көрсеткішті кемі 5 пайызға дейін көтермекшіміз. Яғни бұл 3-4 есе жылдам болады. Ақпаратты жеткізу және өңдеу жағынан. Елімізге тиімділігі бұл енді ең бастысы еліміздің аумағымен өте көптеген терабайт ақпаратты өткіземіз. Олар ақылы байланыс операторларымыз ақша табады. Экономикамыз дамиды.

Теңіз түбімен талшықты-оптикалық кабель тарту Еуропаға тіке шығудың балама бағыты. Әзербайжаннан әрі асса жеткілікті. Қазір интернет жолымыз құрлық арқылы Ресеймен түйіседі. Шақырымы да шалғай. Ал, жаңа желі едәуір қысқа, 400 километрге жуық. Жылдамдығы секундына 400 терабит.

Эрван Ружё, ІТ-сарапшы:

- Қазақстанда көптеген жаңа технологиямен танысуға болады. Мысалы, Цифрлық Жібек жолы жаңғыртылып жатыр. Каспий түбінен кабель өткізу Еуропа мен Азия арасында жаңа цифрлық телекоммуникациялық дәліз құру деген сөз. Бұл екі ортада үлкен терабайттық деректердің берілуін қамтиды. Елдердің ақпараттық қауіпсіздігін нығайтады. Жалпы, талшықты-оптика әзірге әлемдегі ең тез интернет саналады.

Әзербайжан, Баку

Елден Еуропаға жасыл энергия жеткізіледі

Тағы бір тартымды жоба бар. Каспий табанымен «жасыл» энергия Еуропаға тасымалданбақ. Баламалы қуатты Қазақстан, Өзбекстан және Әзербайжан өндіреді. Біздің ел көлемді 7 гигаватқа дейін көбейтуді көздеген.

Ильхам Шабан, энергетика саласы бойынша сарапшы:

- Бұл Ақтаудан Апшерон түбегіне қарайғы бағыт. Шамамен 370 шақырым. Егер саралсақ, Орталық Азияда жаңартылатын энергия көздерін ең көп өндіретін Қазақстан. Жел мен күннен 3 млрд киловатт-сағат қуат алады. Енді Қазақстан мен Өзбекстанда жасыл энергияның жеткілікті көлемін игеріп, оны Бакуге өткізу мәселесі қаралып жатыр. Оған дейін біз Black Sea Project Energy құрылысын да аяқтаймыз. Осылайша энергияны үлкен нарықтарға, Еуропалық Одаққа экспорттаудың балама нұсқасы пайда болады.

Осылайша тыңнан түрен салып, теңіздің түбін де пайдалануға көштік. Жасыл энергия жайын айттық. Интернет желіге келсек, ел аумағына 130 мың шақырымнан аса талшықты-оптикалық кабель тартылған. Алдағы жылдары Батыс-Шығыс гипермагистралі салынады. Мақсат – заман талабына қарай технологиялық және экономикалық тұрғыдан қалыс қалмау.

Нысаналы Ығыл, Марат Диханбаев, Ержан Рахманбердиев