Еліміздегі балалардың 11%-ке жуығы тумасынан ортопедиялық ауруға душар болған. Осыған байланысты бүлдіршіндерді жастайынан ұдайы емдеп оңалту маңызды. Мамандар ел аумағында бірыңғай ұлттық орталық құруды ұсынады.

Ағабек Чикинаев жоғары санаттағы травматолог-ортопед. Салада жүргеніне 30 жылға жуықтады. Қызметіндегі әр күні осылай палата аралаумен басталады. Науқастарының операциядан кейінгі хал жағдайын сұрап әңгімелесу – қызметтік міндеті.

Төсек тартып жатқан Мақсат Атажанов тумасынан сал ауруына шалдыққан. Алайда айналасында болып жатқан жағдайды жақсы түсінеді және қиналса да, ойындағысын анық жеткізе алады. Бірақ өздігінен жүріп-тұра алмайды. Үнемі анасының көмегіне мұқтаж. Қазір елордадағы №2 балалар ауруханасында стационарлық ем қабылдап жатыр.

Дылраба Дадаметова, Түркістан қаласының тұрғыны:

- Күтімдері өте жақсы. Ағабек Әлібекұлы Чикинаевқа мың алғыс. Біз Түркістан қаласынан келдік. Бұл үшінші операциямыз. Осы жерге 2022 жылдан бастап келеміз. Нәтижесі жақсы. Баламның ауырғаны қояды.

Медицина ғылымдарының кандидаты Ағабек Чикинаевтың айтуынша, ортопедия – күрделі сала. Туа біткен аурулардан бөлек, жүре пайда болған буын ақауларын да қамтиды. Мұнда жылына 800-ден астам операция жасалады.

Ағабек Чикинаев, медицина ғылымдарының кандидаты:

- Жарақаттан кейін дұрыс бітпеген сүйекті, қысқа аяқтарды емдейміз. Сүйекте ісік болады ғой, соларды емдейміз. Ортопедияда жолдары өте көп. Қолдың, аяқтың, омыртқаның ортопедиясы бар. Онкологиялық және нейроортопедия бар.

Кәнігі маман салада ширек ғасыр жүрсе де, үнемі ізденіс үстінде. Таяуда Санкт-Петербургтегі халықаралық форумға қатысып, Генрих Турнер атындағы медициналық орталықтың жұмысымен танысып келді. Бірқатар көрші елдің әріптестерімен тәжірибе алмасып, кәсіби біліктілігін шыңдады.

Ағабек Чикинаев, медицина ғылымдарының кандидаты:

- Сол жерде екі ауруханада операция жасадық. Балаларға жамбасын ауыстыру – «эндопротезирование» операциясы болды, соған қатыстым. Екіншісі дисплозия деген операцияға қатыстым. Сондай бір жақсы жұмыс өтті.

Форум соңында Пертес ауруы бар балалардың ортопедиялық электретін пайдалану бойынша ғылыми зерттеуді бастау туралы халықаралық келісімге қол қойылды. Бұл жобаға Қазақстан аумағында жұмыс істейтін кейбір орталықтар да атсалысады. Бағдарлама балалардың жамбас буынын жүйелі түрде емдеуге мүмкіндік береді.

Авторлары: Мирлан Алтынбек, Нұрғали Мамурбаев