Үкімет басшысы Президенттің туризм саласындағы тапсырмаларын орындау бойынша жиын өткізді. Онда Алакөл көлі жағалауындағы ахуал, туристік инфрақұрылым, сервис және қауіпсіздік мәселелері бойынша премьер-министрдің орынбасары Ермек Көшербаев пен Туризм және спорт министрі Ербол Мырзабосынов баяндама жасады.

Туристік аймақтарда тұрғындардың демалуына қолайлы жағдай жасау мақсатында әкімдерге және министрлерге бірқатар тапсырма жүктеді. Мемлекет басшысының берген ескертулерін орындау үшін Премьер-министрдің орынбасары аймақтарды аралап, бұл бағытта атқарылып жатқан жұмыстармен таныспақ. Нәтижесінде заңбұзушылыққа жол берген лауазымды тұлғаларды жауапкершілікке тарту бойынша ұсыныс береді. Бұдан бөлек, жиында Алматы тау кластерін дамыту мәселесі де қаралды. Өйткені жоба аса маңызды инвестициялық бастамалар тізіміне кіреді. Бастапқы кезеңде онда электрмен, газбен жабдықтау, кәріз желілері мен автожолдар салу сынды инфрақұрылымдық жұмыстар жоспарланған. Іргелес аумақтарды абаттандыру мәселесі де қолға алынбақ.