АҚШ пен Еуроодақ арасында сауда шиеленісі күшейді. Вашингтон жаңа баж салықтарын енгізетінін жариялады. Енді ресми Брюссель қарсы шаралар қабылдауды қарастырып жатыр. Президент Трамптың шектеулеріне аймақтың автомобиль өнеркәсібі сияқты басты салалары ілінген. Сондықтан кәсіпкерлер тарифтік текетірестің салдары ауыр болатынын ескертіп, тараптарды келісімге келуге шақырып жатыр.

Америка Құрама Штаттары 1 тамыздан бастап Еуропалық Одақ пен Мексикадан импортталатын бірқатар тауарға 30% көлемінде кедендік баж салығын енгізеді. Бұл туралы президент Дональд Трамп өзінің әлеуметтік желідегі парақшасында ресми мәлімдеді. Шектеулер автокөлік өндірісі, металлургия және ауыл шаруашылығы салаларын қамтиды. Брақ Еуроодақтың да жауабы көп күттірмеді. Ұйым комиссиясының төрағасы Урсула фон дер Ляйен Брюссель қарсы шараларды 1 тамызға дейін тоқтатып, түйткілді келіссөз арқылы шешуге ниетті екенін жеткізді.

Урсула фон дер Ляйен, Еуроодақ комиссиясының төрағасы:

- АҚШ бізге тариф енгізу туралы ескерту хатын жолдады. Біз мәселені келіссөз арқылы шешуге күш саламыз. Алайда ол нәтиже бермесе, қарымта жауап қайтарылады. Еуроодақ сауда серіктестерін кеңейтіп жатыр. Индонезиямен еркін сауда келісімі – соның бір дәлелі.

Германия кәсіпкерлер қауымдастығы ахуалға байланысты алаңдаушылық білдірді. Себебі сауда соғысынан елдің автомобиль өнеркәсібіне миллиардтаған шығын келуі мүмкін. Сондықтан шиеленістің ушығуына жол бермеуге үндеді. Вашингтонның қадамын ескерту ретінде бағалап, үкіметті жедел әрекет етуге шақырды.

Сайрус де ла Рубиа, Гамбург коммерциялық банкінің бас экономисі:

- АҚШ бұл саясаттан Еуроодақтан да көп зардап шегуі мүмкін. Германия дағдарысты жеңіл еңсереді деп ойлаймын. Елде ауқымды инфрақұрылымдық бағдарлама жүзеге асырылып жатыр. Қорғаныс саласына да инвестиция ұлғайып келеді. Бұл Америка тарапынан сұраныстың төмендеуінен туындайтын шығынның орнын толтыруға көмектеседі.

Жаңа тарифтер өнеркәсіп өкілдерін ғана емес, ауыл шаруашылығы саласын да алаңдатып отыр. Әсіресе азық-түлік экспортына көп залал келгелі тұр. Мәселен, Франция жыл сайын АҚШ-қа 350 миллион еуроға ірімшік пен басқа да сүт өнімдерін жеткізеді. 30%-тік баж салығынан оның көлемі едәуір азаяды.

Франсуа-Ксавье, Франция ұлттық сүт өнімдері қауымдастығының бас директоры:

- АҚШ – біз үшін аса маңызды нарық. Біз ол жаққа жылына 25 тонна ірімшік жөнелтеміз. 30% тариф бізге ауыр соғады. Дегенмен біз мұндай жағдайға ішінара дайынбыз.

Қалай дегенмен Еуроодақ мәселені келіссөз арқылы шешуге ниетті. Алайда ұйым өкілдері кез келген сценарийге дайын болу керектігін де айтады. Өйткені келіссөздер нәтиже бермесе, тарифтік текетірес ауқымды сауда соғысына айналуы әбден мүмкін.

Авторы: Динара Орынтай