Ақтауда «Таза Қазақстан» жалпыұлттық экологиялық акциясы аясында, Каспий теңізінің «Жылы жағажай » аумағында жаппай сенбілік ұйымдастырылды. Оған Маңғыстау облысы әкімінің орынбасарлары, Ақтау қаласының әкімі, коммуналдық қызметшілер, «Жасыл ел» еңбек жасағы мен тұрғындар барлығы 400-ге жуық адам қатысып, 12 тонна қоқыс жиналды.

Сенбіліктің басты мақсаты – теңіздің жағасын қоқыс қалдықтарынан тазартып, демалушыларды тазалық сақтауға шақыру. Себебі, жағажайларда қоқыс қалдыру деректері жиі кездеседі. Кеше ғана аталған аумаққа 8 мыңға жуық көлік келіп, 30 мыңнан астам адам демалған. Алайда көпшілігі азық-түлік қалдықтарын жинамай кеткен.

Тілеген Әбішев, Маңғыстау облысы әкімінің орынбасары:

Бұл жерде шамамен 80-ге жуық коммуналдық қызметкер еңбек етуде. Алайда демалушылар арттарынан үйіліп қалған қоқысты жинамайды. Қоқыс жәшіктерін орнатып, олардың санын да көбейттік. Бірақ адамдар 50 қадам жердегі контейнерге дейін баруға ерінеді. Сондықтан қала тұрғындарын, қонақтар мен демалушыларды табиғатты аялауға шақырамыз.

Айта кететін жәйт, осыдан екі жыл бұрын облысқа 390 мыңға жуық турист ат басын тіреген. Ал биыл шомылу маусымында өңірге 500 мыңнан астам демалушы келді.

Ақмарал Сүйінбаева, Ақтау қаласының тұрғыны:

Маған өз теңізіміз өте ұнайды. Бірақ соңғы кезде жағажайлар ластанып кеткен. Сондықтан бүгін «Таза Қазақстан» атты әкімдік бастамасына қосылып, қасымдағы адамдармен бірге жағажайды тазалап жатырмыз.

Анна Шипанова, турист:

Біз Мәскеуден келген туристерміз. Үш күннен бері теңізге шомылып жүрміз. Жағалау таза екен. Құмы да, суы да керемет. Табиғаттың осындай сұлулығын сақтап қалу керек.

Ресми мәлімет бойынша, жаз мезгілі басталғалы экологиялық құқық бұзушылық үшін, мыңға жуық адамға әкімшілік хаттама толтырылып, жалпы сомасы 70 миллион теңгеден астам айыппұл салынған.

Аягөз Оралбайқызы