Димаш Құдайбергеновтың қарындасы Раушан Құдайберген ұзатылды.

Бұл туралы Caravan.kz медиа порталы хабарлайды.

Димаш Құдайбергенов әлеуметтік желідегі парақшасында жазба жариялап, қарындасына ағалық тілегін айтты.

““Жол мұраты — жету, қыз мұраты — кету” дейді қазақ халқы. Оны ұғынсақ та, бауыр етінен жұлып алғандай етіп қарындасты өзге жұртқа аттандыру кімге болса да оңай емес екен?! Дегенмен, теңін тауып, ата-анасының, туған-туыстарының ризашылығымен кетіп бара жатқаны көңілге қуаныш ұялатады. Қолымыздан ұшып бара жатқан қызымыздың қонған жері құтты болсын! Барған еліне тастай батып, судай сіңсін! Құдай қосқан жарына бақ болып қонсын, қосағымен қоса ағарсын! Раушантайыма Мансұр ініммен бірге, “Қарлығашым ұя салғанда…” атты әнімді ақжүрек тілегіміз ретінде қабыл алғайсың! Жүректегі сағыныш пен қимастықты осы әннің өн бойынан көрсеткіміз келді. Бақытты бол, қарлығашым менің!” — деп жазды Димаш.

Айта кету керек, күйеу жігіт Ермахан Аймахан 2000 жылы дүниеге келген. Т.Жүргенов атындағы қазақ ұлттық өнер академиясының түлегі. Бүгінде ол “Музыкалық жас көрермен” театрында актёр болып қызмет етеді.

Желі қолданушылары жұлдызды әулеттегі тойдың нағыз қазақы нақышта өткеніне риза болуда.

”Нағыз тектілердің тойы, бір тойда бүкіл қазақы дәстүрді көрсетті”, “Нағыз үлгі болатын той, не деген әдемілік”, “Сәкен Майғазиевтің әйелі біз не істедік деп отырған шығар. Олардың тойында бір туысын көрмеп едік”, “Үлгі ретінде айта жүретін той болыпты”, — деп жазды олар.