Қазір U-19 санатындағы Еуропа чемпионы – Португалия, ал екі мәрте (2019 және 2022 жылдары) топ жарған Испания ең табысты команда саналады.

Албания астанасы Тиранада өткен УЕФА Атқарушы комитетінің жиынында бірқатар халықаралық және клубтық турнирлердің шешуші ойындарын қабылдайтын қалалар анықталды.

Соның ішінде Қазақстан футбол федерациясы мен Қазақстан футзал қауымдастығының 19 жасқа дейінгі футзалшылар арасындағы Еуропа чемпионатының финалдық кезеңін елімізде өткізу туралы өтінімі мақұлданды.

Осы шешімге сәйкес, Қазақстан жасөспірімдер құрамасы қабылдаушы ел ретінде автоматты түрде финалдық кезеңге жолдама алады.

Астанадағы "Жекпе-Жек" аренасында сегіз ұлттық құрама ойнайды. Арена 2019 жылдың шілдесінде ашылып, Қазақстанның футзал құрамасының бірнеше матчын қабылдаған. Мұнда күрес пен дзюдодан ірі жарыстар тұрақты түрде өткізіліп тұрады.

Қазақстан футбол федерациясы үшін бұл құрамалар арасындағы УЕФА турнирінің алғашқы финалдық кезеңі болмақ. Ал 2011, 2017 және 2019 жылдары "Қайрат" Алматыда футзалдан Чемпиондар лигасының финалдық кезеңдерін өткізген еді.

Турнирді 2027 жылдың 26 қыркүйегі мен 3 қазаны аралығында өткізу жоспарланып отыр. Алаң қожайындарымен бірге іріктеу кезеңінен өткен жеті құрама бақ сынайды.