Қазақстан Арменияға есе жіберді .

Еуропа біріншілігі іріктеу кезеңінің соңғы туры қос құрама арасында өтті. Кездесу барысында армениялық Никита Хромых 7-ші, 14-ші минуттарда гол соқты. Оған жерлесіміз Дәурен Тұрсағұлов 16-минутта бір голмен жауап қайырды. Екінші кезеңде Армения есепті еселей түсті. Қос голдың авторы атанған Никита Хромых үшінші голды өз атына жазды. Оған қоса армениялық қақпашы Альберт Агаджанов бір голды қарсыласқа, бір голды өз қақпасын соғып алды. Осылайша Қазақстан Арменияға 2:4 есебімен есе жіберіп, өз тобында екінші орынды місе тұтты. Топта бірінші орын алған Армения құрлықтық дода финалдық сатысына тікелей шықты. Ал, жерлестеріміз енді 2025 жылдың қыркүйек айында өтетін өтпелі ойындары арқылы жолдамаға таласады.

Рыбакина ширек финалға шыға алмады

Рыбакина ширек финалға шыға алмады. Индиан-Уэллс турнирінің төртінші айналымында жерлесіміз өзінің бұрынғы отандасы Мирра Андреевамен шеберлік байқасты. Осыдан бір ай бұрын ғана екеуінің жолы Дубайдағы жарыста түйіскен. Сол жолы үш сетқа созылған ойында Ресейлік Мирра Андреева жеңіске жеткен болатын. Бұл жолы да ресейлік спортшы басым түсті. Ойын небәрі екі сетқа созылды. Есеп 6:1 6:2. Бір сағаттан аса уақытқа созылған бәсеке барысында Рыбакина мүлдем эйс жасамады, яғни басты қаруының бірінен айырылды деуге болады. Сондай-ақ 1 брейкпен шектелді. Андреева 2 эйспен бірге 12 брейк-пойнттың тең жартысын мүлт жібермеді. Рыбакин үшін турнир аяқталды. Ал Мирра Андреева ширек финалда Украин қызы Элина Свитолинамен кездеседі.

Чемпиондар лигасы: ширек финалға шыққан командалар белгілі болды

Чемпиондар лигасының ширек финалына шыққан командалар белгілі болды. Испанияның Реал Мадрид клубы жарысты ерте аяқтай жаздады. Сырт алаңда Атлетико Мадридпен кездескен олар қарымта ойынның негізгі кезеңінде қарсыласына 0:1 есебімен есе жіберді. Екі кездесудің нәтижесі тіркеліп, ойын пенальтиге дейін барды. Реал Мадрид клубының жолы болып, жарысты жалғастыруға мүмкіндік алды. Сондай-ақ англиялық клубтар қарсыластарын аямады. Астон Вилла Бельгияның Брюггесін, Арсенал Нидерландтың ПСВ клубын тізе бүктірді. Германияның Боруссия Дортмунд командасы болса франциялық Лилль клубын қапы қалдырды. Енді ширек финалда Астон Вилла мен Пари Сен-Жермен, Реал Мадрид пен Арсенал, Интер мен Бавария, Боруссия Дортмунд пен Барселона шеберлік байқасады. Ойындар 8 және 15 сәуір күндеріне белгіленген.

«Жетісу» тоғыз дүркін ел чемпионы атанды

Жетісу тоғызыншы рет Қазақстан чемпионы атанды. Өскеменде волейболдан әйелдер арасындағы ел біріншілігі өз мәресіне жетті. Кеше алаң иелері Берел мен Жетісу чемпиондық атақ үшін үшінші, шешуші кездесуін өткізді. Осыған дейін талдықорғандықтар ел біріншілігінде сегіз рет үздік атанған болатын. Олар соңғы рет 2020 жылы жеңімпаз болды. Ал құрылғанына көп болмаған Берел өткен жылы күміс жүлдені қанағат тұтқан... Бұл жолы бірінші партияда Ришат Гилязутдинов жаттықтыратын өскемендіктер сәтті ойнады. Алайда сербиялық маман Марко Гршичтің шәкірттері өздерінің шеберліктерінің басым екендігін дәлелдеді. Команда капитаны, украиналық Карина Денисова бастаған жетісулықтар чемпиондыққа тән өнер көрсете білді. Есеп 3 те 1. Жетісу ел чемпионы атанса, Берел екінші жыл қатарынан күміс медальға ие болды. Ал Қуаныш үздік үштікті түйіндеді. Өткен жылы ел чемпионы болған Тұран төртінші орынға табан тіреді.