12 наурыз күні Ереванда шешуші ойын. Яғни футзалдан Армения мен Қазақстан құрамасы Еуропа чемпионатының жолдамасына таласады. Дәл қазір турнир кестесінде 13 ұпаймен армяндар топ бастап тұр. Қазақстан қоржынында 10 ұпай. Алаң иелерін тең нәтиже де қанағаттандырса, бізге тек жеңіс қажет.

Өкінішке қарай қақпашы Игита жарақатынан айығып үлгермеді. Тас қамал қорғаушы Дугластың да алаңға шығу-шықпауы белгісіз. Десе де Дәурен Тұрсағұлов пен Біржан Оразов және Шыңғыс Есенаманов бастаған жігіттердің аянып қалмасы анық.

Естеріңізге салайық, келер жылы Латвия мен Литвада өтетін құрлық додасына әр топтан тек жеңімпаз команда ғана барады. Ал екінші орын алған 8 команда өзара қосымша жолдамаға таласады. Бұған дейін де талай мықтыға тұсау салған біздің жігіттердің Ереванда да ерлік жасауға шамалары жетеді. Тек сәттілік серік болсын дейміз.

Тараздық өрендер топ жарды

Астанада футболдан 8-9 жастағы балалар арасындағы республикалық турнир өтті. «Бұл жас деңгейінің таңдалуы бекер емес. Дәл осы кезде балалар үлкен спортқа алғашқы қадамдарын жасап, футболшы ретінде қалыптаса бастайды. Осы тұрғыда оларға көбірек ойын уақытын беріп, шеберлігін шыңдау аса маңызды», — дейді мамандар.

Балалар арасындағы жарысқа елдің түкпір-түкпірінен 16 команда жиналды. Олар 4 күн бойы өзара мықтыны анықтап, нәтижесінде Тараздан келген өрендер жеңімпаз атанды. Екінші орын павлодарлықтарға бұйырса, Астанадағы №8 спорт мектебінің шәкірттері үштікті түйіндеді.