Қазақстан азаматтарының 95 проценттен астамы елдегі этносаралық қатынастарды тұрақты деп санайды.

Бұл туралы ҚР Мәдениет және ақпарат министрлігінің телеграм арнасында жарияланды. Министрлік қоғамдық келісім мен азаматтық бірлікті нығайту бағытындағы жұмыстарды жүйелі түрде жалғастырып келеді. Бүгінде елімізде жүзден астам этнос өкілі бейбітшілік пен татулықта өмір сүріп, Әділетті Қазақстанды құру жолында бірігіп еңбек етуде. Этносаралық келісімді нығайту мақсатында тиімді жүйе қалыптасқан. Ел бойынша этномедиаторлар даярланып, 80-ге жуық ақпараттық-түсіндіру тобы белсенді жұмыс атқаруда. Сонымен қатар Қазақстан халқы Ассамблеясының бастамасымен бүгінде 1000-нан астам этномәдени бірлестік және 4000-ға жуық қоғамдық құрылым қызмет етіп отыр. Олардың жұмысына 50 мыңнан астам азамат тартылған. Бұдан бөлек "Ақсақалдар кеңесі" мен "Аналар кеңесі" халықты қоғамдық өмірге жұмылдыруда ерекше рөл атқарып келеді. Айта кетейік, 2025 жылы алғаш рет Алматы, Жамбыл, Түркістан және Жетісу облыстарында аудандық деңгейдегі ассамблеялар құрылды.