Мәжіліс депутаты Ринат Зайытов Алматыда ресейлік саясаткер Владимир Жириновскийге ескерткіш орнату туралы ақпаратқа қатысты пікір білдірді, деп хабарлайды inbusiness.kz сайты.

Тілшілер депутаттан "Владимир Жириновскийге Алматыда ескерткіш қойылуы керек пе?" деп сұрады.

"Бұл ақылға қонбайтын нәрсе. Бірақ Досаев секілді әкімдер аман болса, қойылып кетуі де мүмкін", — деді мәжілісмен.

Журналистер "Жириновскийдің тарихи отаны – Қазақстан. Ол ескерткіш қойылуға лайық па?" деп нақтылады.

"Біз Оспан батырға Қытайда қоя аламыз ба ескерткіш? Қоя алмаймыз ғой. Әркімнің өзінің мемлекеті бар шығар. Біз Невскийге (ред. – Александр Невский) қойдық емес пе бір рет. Ол да ақылға қонбайтын нәрсе. Заңда Қазақстанның дамуына үлес қосқан адамдарға ескерткіш қойылады деп нақты жазылған. Оның Қазақстанға не қатысы бар?", — деді Ринат Зайытов Мәжіліс кулуарында.

Айта кету керек, осыған дейін Жириновскийге Алматыдан ескерткіш бұйырмайтын болғанын жазғанбыз.