3-ші наурыздан бастап күшіне енген жаңа заңда осындай бап бар. Есірткі саудасын ұйымдастырып, құралдарын жасап, оны қайта өңдейтіндер мен есірткіні тасымалдаушыларға 15-тен 20 жылға дейін, не өмір бойына бас бостандығынан айыру жазасы көзделген. Ал есірткіні жасырып қойып кетушілер үшін керісінше жаза мерзімі қысқартылды. Бұл мұндай қылмысты бірінші рет жасағандарға қатысты. Сондай-ақ бұл құжатта құқықбұзушының жасы мен жағдайы ескерілген. Себебі елімізде есірткіні жасырып қоятындардың дені – 16 мен 30 жас аралығындағы азаматтар.

Қуандық Әлжанов, ҚР ІІМ Есірткі қылмысына қарсы іс-қимыл комитеті төрағасының орынбасары:

- Бұдан бөлек жазаны қатаңдататын бірнеше жаңа бап пен түзетулер бар. Соның бірі өздерінің қызметтік өкілеттіліктерін пайдалана отырып, есірткінің заңсыз айналымымен айналысатын лауазымды адамдар үшін 15 жылдан өмір бойына бас бостандығынан айыру жазасы қарастырылған.