Жас футболшымыз Қазақстан жасөспірімдер құрамасы сапында да өнер көрсетеді.

17 жастағы қазақстандық жартылай қорғаушы Алдияр Нұрғали Испания чемпионатындағы жарқын ойынымен көзге түсті. "Леванте" (U-19) командасының намысын қорғайтын жас футболшы "Эльче" (U-19) клубына қарсы өткен сырт алаңдағы кездесуде дубль жасап, командасына маңызды жеңіс әкелді.

Матч 2:1 есебімен "Леванте" пайдасына аяқталды. Алдияр ойынның 18-ші және 67-ші минуттарында мергендік танытты. Ал, алаң иелері сапынан Хосе Дура Касильяс 30-шы минутта бір голмен жауап қайтарды.

Алдияр Нұрғали – алматылық "Қайрат" клубының түлегі. 2023 жылдың басында ол өз шеберлігін испан футболында сынап көруге бел байлап, шетелге аттанған болатын.
Сондай-ақ Алдияр Қазақстанның жасөспірімдер құрамасы сапында Еуро-2026 чемпионатының элиталық іріктеу кезеңіне жолдама алуға елеулі үлес қосты. Шешуші кезеңде қазақстандық жас футболшылар Украина, Румыния және Солтүстік Ирландия құрамаларына қарсы бақ сынайды.