Жол-көлік оқиғаларының саны екі есе көбейген.

Сенатор Марат Қожаев депутаттық сауалында жүргізуші куәлігін алу тәртібін қайта қарауды ұсынып отыр, деп хабарлайды inbusiness.kz сайты.

Оның айтуынша, былтыр жол-көлік оқиғалары алдыңғы жылмен салыстырғанда екі есе көбейіп, жарақат алған балалар саны 4 мыңнан 10 мыңға дейін жеткен.

Сенатор жол апаттарының жиілеп кетуінің негізгі себебі ретінде жүргізушілерді дайындау деңгейінің төмендігін айтты. Бас прокуратураның мәліметінше, жол-көлік оқиғаларының 96%-ы жол қозғалысы ережелерін бұзудан туындайды.

Жүргізушілер мектебінің көптеген түлегі сапалы білім алмайды, ал кейбір жүргізуші куәлігін заңсыз жолмен иемденеді, дейді ол. Такси қызметінде де елеулі кемшіліктер байқалып отыр. Такси жүргізушілері демалыссыз жұмыс істейді және міндетті медициналық тексеруден өтпейді, бұл ауыр зардаптарға әкеледі.

"Жүргізушілерді даярлау және аттестаттау жүйесін жетілдіру шараларын қабылдау қажет. Бұл үшін жүргізушілерді оқытатын ұйымдарға мемлекеттік бақылау енгізу, емтихан тапсыру және жүргізуші куәлігін алу тәртібін қайта қарау керек. Сонымен қатар, айналма жолдардың құрылысын жеделдету, елді мекендерде жарықтандыру мен жаяу жүргіншілер өткелдерін қамтамасыз ету, жол-көлік оқиғаларын есепке алудың бірыңғай цифрлық жүйесін әзірлеу және заманауи жол стандарттарын енгізу маңызды. Жол ережесін бұзушыларға бақылауды күшейту мақсатында жасырын патрульдеу әдісін кеңінен қолдану, құқық бұзушылықтарды автоматты түрде тіркеу және жол қозғалысы ережелерін жүйелі түрде бұзатын жүргізушілерді қайта емтихан тапсыруға міндеттеу ұсынылады", – деді Марат Қожаев.