Португалиялық футбол жұлдызы Криштиану Роналду өзі өнер көрсетіп жүрген Сауд Арабиясының «Әл-Наср» клубын сатып алуға ниетті, деп хабарлайды Sn.kz ақпарат порталы.

Бұл туралы Vesti.kz мәлімдеді.

A Bola басылымының мәліметінше, Роналду «Милан» клубының иесі Джерри Кардинале және кәсіпкерлер Ибрагим әл-Мухайдиб, Мохаммед әл-Хурайиджи мен Шараф әл-Хариримен бірлесіп, Сауд Арабиясының Мемлекеттік инвестициялық қорына (PIF) клубты сатып алу жөнінде ұсыныс дайындап жатыр.

Жоспар бойынша консорциумның бес мүшесі кемінде 92 миллион еуродан инвестиция салуы тиіс. Қаражат «Әл-Насрды» қаржыландыруға бағытталмақ.

Келіссөздер шешуші кезеңге жеткен. Алдағы 48 сағатта RedBird Capital Partners компаниясы мен консорциум өкілдері PIF басшылығымен кездесіп, клубтың болашағын талқылауды жоспарлап отыр. Кездесу нәтижесінде мемлекеттік қор клубты бақылауды беруге келісуі немесе ұсыныстан бас тартуы мүмкін.