Петропавлдағы металл-пластик бұйымдар шығаратын зауытта жүздеген әйел еңбек етеді.

Мысалы, Ольга Гольцер саналы ғұмырын өндірісте өткізген.

Биыл еңбегі бағаланып, бригадир қызметіне көтерілді.

Ольга Гольцер бұл зауытта 13 жылдан бері жұмыс істеп келеді. Бұған дейін түрлі пластикалық өнім шығаратын оператор болған ол биылдан бастап өндіріс бригадирі атанды. Енді шағын ұжымның жұмысын ұйымдастырады.

Ольга Гольцер, өндіріс учаскесінің бригадирі:

- Бұл өте ауыр жұмыс. Жауапкершілігі де жоғары. Өндірісте негізінен ер адамдар істейді. Бірақ, мен ортаға тез сіңісіп кеттім. Ең бастысы өзіме ұнайды. Айлық табысым да жақсы. Қазір қол астымда 11 адам бар.

Бұл зауытта пластикалық тұрмыстық заттың 200-ден астам түрі жасалады. Ольга Гольцердің міндеті әр операторды қадағалап, өндіріс барысын реттеу. Әріптестері оны тәжірибелі маман ретінде таниды. «Әйел болғанына қарамастан кәсіпорын жұмысын ұршықша иіріп әкетті», — дейді олар.

Ринат Жұмашев, бригадир:

- Ольга өте жауапты маман. Бұрын бірге істедік. Қазір бөлек бригадалардамыз. Соған қарамастан маған әрдайым ақыл-кеңесін айтып, бағыт-бағдар беріп отырады. Ол жағынан аянып қалмайды.

Кәсіпорында 112 әйел жұмыс істейді. Олардың әрқайсы өз міндетіне асқан жауапкершілікпен қарап, өндірістің дамуына зор үлес қосып келеді.

Айдарбек Айтмұхамбетұлы, Қуаныш Қазбеков