Бұл туралы Батыс туристік агенттіктері мәлімдеді.

Пхеньянның бес жыл оқшауланғаннан кейін шекарасын туризм үшін қайта ашу туралы шешімі кенеттен жойылып отыр, деп хабарлайды inbusiness.kz сайты ВВС-ге сілтеме жасап.

Осылайша, туристік агенттіктер саяхатшылардың Солтүстік Кореяның Қытаймен шекаралас Расон қаласына бара алмайтынын еске салған.

КХДР Covid-19 вирусының таралуын болдырмау үшін 2020 жылдың басында шекарасын жапты, артынша Қытайдан азаматтарының заңсыз кіруіне жол бермеу үшін солтүстік шекарасындағы қорғанысты қатаңдатты.

Сол уақыттан бері Солтүстік Корея Ресей мен Қытайдың қолдауына сүйеніп, әлем елдерінің көп бөлігінен оқшауланды.

Ақпан айында Батыстың бірнеше туроператоры Солтүстік Корея тарапынан рұқсат алғаннан кейін КХДР солтүстік-шығысындағы Расон қаласына саяхатшылардың аздаған санын жібергенін хабарлаған еді.

Десе де, күні кеше кейбір туристік компания бұл сапардың түсініксіз себеппен тоқтатылғанын хабарлады.

– Серіктестер бізге Расонға турлар тоқтатылғанын хабарлады, – деп жазылған Young Pioneer Tours туристік агенттігінің сайтында.

Koryo Tours туристік агенттігі де Расонның уақытша жабылғанын, ал оның Бейжіңде орналасқан бас менеджері Саймон Кокерелл AFP агенттігіне Солтүстік Кореядағы туристер сапарын жоспарланғандай аяқтайтынын айтқан.

Испанияның KTG туристік агенттігінің турлар үйлестірушісі Райко Вега да аталған агенттікке КХДР-ға турлардың тоқтатылғанын растап: "Біз оның себебін және оның қанша уақытқа созылатынын білмейміз" деп қоса кеткен.

Еске салайық, Солтүстік Корея бірнеше халықаралық сауда және ресми делегацияны қабылдады, өткен жылы пандемиядан кейін алғаш рет ресейлік туристерге елге кіруге рұқсат беріп, күтпеген шешім шығарып еді.

Қытай және Ресей шекараларына жақын орналасқан Расон 1991 жылы Солтүстік Кореядағы өзінің визалық режимі бар алғашқы арнайы экономикалық аймағы саналды.