2025 жылғы 12 наурызда ҚР Ұлттық экономика министрлігі (ҰЭМ) такси компанияларының олардың қызметіне бюджет пен салық реформасының әсері туралы мәлімдемесіне түсініктеме берді, деп хабарлайды Zakon.kz.

2025 жылғы 20 ақпанда Мәжіліске қарауға ұсынылған Салық кодексі жобасына енгізілген жаңа түзетулер пакетінде такси жүргізушілері үшін жеңілдетілген салық салу режимі қарастырылған.

"Бұл режим салық төлемдерінсіз жүзеге асырылады: ҚҚС және басқа да салықтар салынбайды, жеке табыс салығының мөлшерлемесі нөлге тең. Такси жүргізушілері тек 4% мөлшеріндегі бірыңғай төлемді төлейді, оған зейнетақы жарналары, әлеуметтік аударымдар және медициналық сақтандыру кіреді. Бұл режимді жеке кәсіпкер ретінде тіркелмей-ақ пайдалануға болады. Осылайша, такси жүргізушілері үшін салық жүктемесі артпайды. Бұған қоса, такси жүргізушілері интернет-платформа операторымен (Яндекс және т.б.) такси парктерінің делдалынсыз тікелей жұмыс істей алады." ҚР Ұлттық экономика министрлігі

Сонымен қатар ҚР ҚМ Мемлекеттік кірістер комитетінің мәліметінше 2024 жылдың қорытындысы негізінде "такси" қызметінің түрі, оның ішінде жалға беру бойынша 15 мыңға жуық салық төлеуші жеңілдетілген декларация режимін қолданады.

Оның ішінде тек 924 салық төлеуші 15 млн теңгелік шекті сомадан асады. Демек, ҚҚС төлеу міндеттемесімен шекті соманың төмендеуі олардың тек 6%-на ғана әсер етеді. Бұл – ҚҚС төлеуге міндетті ірі таксопарктер.

Интернет-платформа операторы ҚҚС төлеуші болып табылады. Сонымен қатар, такси қызметі нарығындағы бағалар нарықтық қатынастарға, бәсекелестікке, сұраныс пен ұсынысқа байланысты қалыптасатынын атап өткен жөн.